मंसिर महिनामा पाँचवटा नेपाली फिल्म रिलिज भए, तिमध्ये कुनैले हलमा दर्शक तान्न सकेनन् ।

२ गते ‘चोर र पुलिस’ नामक फिल्म प्रदर्शनमा आयो । बुद्धि तामाङ, धिरेन शाक्य, जयकिशन बस्नेतलगायतको अभिनय रहेको यो फिल्म हलमा केही दिन पनि टिक्न सकेन । ९ गतेदेखि अर्को फिल्म ‘मीलन’ प्रदर्शनमा आयो । सलोन बस्नेत, कुशल शाह ठकुरी, शिल्पा थापालगायतको अभिनय रहेको यस फिल्मले पनि हलमा दर्शक तान्न सकेन । 

१६ गतेदेखि प्रदर्शनमा आएको रिस्ता बस्नेत अभिनित ‘पासो’लाई पनि पहिलो दिनबाटै दर्शकको खडेरी देखियो । गत शुक्रवारदेखि प्रदर्शनमा आएका दक्षिण एसियाली खेलकुदका स्वर्ण पदक विजेता खेलाडी राजकुमार राई अभिनित ‘सोल अफ द कमाण्डाे’ र भोलाराज सापकोटा, नम्रता सापकोटा अभिनित ‘डेसान’को अवस्था पनि उकेदलाग्दो देखियो । यसरी हेर्दा समग्र मंसिर महिना नै नेपाली फिल्मका लागि उकेदलाग्दो देखियो । मंसिरमा रिलिज भएका पाँचवटै नेपाली फिल्मका निर्माताले लगानीको सानो अंश पनि फिर्ता पाउने देखिँदैन । 

कात्तिकको ११ गतेदेखि प्रदर्शनमा आएको ‘महापुरुष’पछि हलमा कुनै नेपाली फिल्मले दर्शक तान्न सकिरहेका छैनन् । व्यापारिक खडेरी लागिरहेको अवस्थामा अब कुन नेपाली फिल्मले दर्शकको साथ पाउँछ त्यो पनि यसै भन्न सकिने अवस्था छैन ।