३० असार २०८३, मंगलबार
इन्ट्रा नेशनल वेलफेयर एण्ड सपोर्ट फाउन्डेसन अफ अमेरिकाको आयोजनामा नेपालकै पहिलो अन्तर्राष्ट्रिय रियालिटी शो ‘मेरो भ्वाइस यूनिभर्स र मेरो डान्स यूनिभर्स’ को आयोजना हुने भएको छ । नक्सालस्थित एक होटलमा आयोजित कार्यक्रममा फाउन्डेसनले प्रतियोगिताका लागि विश्वभरका मानिसले इन्ट्रा नेशनल एपमार्फत आवेदन दिन सक्ने जनाएको छ । १८ बर्ष माथिका व्यक्तिले प्रतियोगिताको लागि आवेदन दिन सक्नेछन् ।
शोमा सहभागी हुन चाहने विश्वभरका नेपाली भाषीहरुले इन्ट्रा फाउन्डेशनको एप डाउनलोड गरेर आवेदन रजिष्टर गर्न सक्ने आयोजकले जनाएको छ । फाउन्डेसनका अध्यक्ष डिल्ली अधिकारीले “हामी हाम्रो संस्कृति जोगाउन एकजुट भएर लाग्नुपर्छ । हाम्रो पहिचान नै हाम्रो भाषा, संस्कृति, र दुखमा परेकाहरूलाई मद्दत गर्नुमा छ“ भने ।
फाउन्डेसनको उद्देश्य नेपाली मनोरञ्जन क्षेत्रमा सांगीतिक क्रान्ति ल्याउने रहेको उनले बताए । शोमा सहभागी हुन चाहने विश्वभरका नेपाली भाषीहरुले अनलाइन आवेदन दिन सक्ने उनको भनाइ छ । प्राथमिक छनौट प्रक्रियापछि फाउन्डेसनले विश्वका विभिन्न स्थानमा अडिसन सञ्चालन गर्ने जनाएको छ । शोका लागि आगामी जनवरीको अन्तिमसम्म आवेदन दिनसक्ने समय तोकिएको छ ।
कम्पनीका अनुसार ‘मेरो भ्वाइस यूनिभर्स’ को निर्णायक मण्डलमा सुरेश अधिकारी, शिव परियार, अन्जु पन्त, सुजाता वर्मा, पुष्पन प्रधानलगायत छन् । मेरो डान्स यूनिभर्स’ को निर्णायक मण्डलमा मिथिला शर्मा, दिलीप रायमाझी, शंकर बि.सी, केकी अधिकारी, प्रियंका कार्की, र नरमन राई हुने आयोजकले बताएको छ ।
शोहरुको निर्देशन एलिन श्रेष्ठले गर्नेछन् । उनले यसअघि पनि धेरै राष्ट्रिय तथा अन्तर्राष्ट्रिय रियालिटी शोहरुको निर्देशन गरिसकेका छन् । यी शोहरु नेपालकै सर्वाधिक धेरै धनराशी भएको रियालीटी शो भएको आयोजकको दावी छ । फाउन्डेसनका अनुसार ‘मेरो भ्वाइस यूनिभर्स’ का विजेताले एक करोड रुपियाँ पाउनेछन् ।
फस्ट रनरअपले ३० लाख र सेकेन्ड रनरअपले २० लाख रुपियाँ पुरस्कार पाउने छन् । यस्तै, ‘मेरो डान्स यूनिभर्स’ को विजेताले पनि एक करोड रुपियाँको पुरस्कार पाउनेछन् । फस्ट रनरअपले रु ३० लाख र सेकेन्ड रनरअपले रु २० लाख पुरस्कार पाउनेछन् । फाउन्डेसनले नेपाल बाहेक, म्यानमार, थाइल्याण्ड, भुटान, भारत, अष्ट्रेलिया, अमेरिका, क्यानडालगायत युरेपेली देशबाट पनि नेपालीभाषीहरुको बृहत् सहभागिताको अपेक्षा गरेको छ ।
