पुष २९ बाट सार्वजनिक प्रदर्शनमा आउने चलचित्र ‘तिम्रो मेरो साथ’को टिम मोफसल यात्रा सकेर राजधानी फर्किएको छ । पर्यटकीय नगरी पोखराबाट सुरु भएको मोफसल यात्रा दमकमा पुगेर सम्पन्न गर्दै चलचित्रको टिम काठमाडौं फर्किएको हो ।

पोखरामा प्रेस भेटघाट र चलचित्र प्रचार गरेपछि टिम चितवन पुगेको थियो । चितवनका विभिन्न क्याम्पस, हल र मलमा दर्शकसँग साक्षात्कार गरेको टिमले त्यहाँ चलचित्रको शीर्ष गीतपनि सार्वजनिक गरेको थियो ।

चितवन भ्रमणपछि अभिनेता पुष्प खड्का, अभिनेत्री साम्राज्ञी राज्यलक्ष्मी शाह, अर्का अभिनेता सन्दीप क्षेत्री र निर्देशक रमेश एमके पौडेलसहितको टिम हेटौंडा पुगेको थियो ।

हेटौंडामा पत्रकार सम्मेलन गरेर टिमले चलचित्रबारे जानकारी दियो । हेटौंडाका संचारकर्मीसंगको साक्षात्कारपछि टिम सर्लाहीको लालबन्दी पुगेको थियो । 

लालबन्दीमा कन्सर्ट गरेको टिमले दर्शकको उल्लेख्य साथ पायो ।

साम्राज्ञी, पुष्प र सन्दीपले दर्शक झुमाएका थिए । दर्शक संख्या बढी हुँदा प्रहरीलाई भिड व्यवस्थापन गर्न हम्मे–हम्मे परेको थियो । 

लालबन्दीमा साम्राज्ञी, पुष्प र सन्दीपको क्रेज देखियो । दर्शकहरु उनीहरूसँग नजिक हुन र फोटो खिच्न उत्साहित देखिन्थे ।

लालबन्दीको सफल भ्रमणपछि ‘तिम्रो मेरो साथ’ टिम इटहरी र दमकतर्फ पुगेको हो । 

इटहरीमा चलचित्रको टिमले शहर परिक्रमा गरेको थियो । अटो रिक्सामा चलचित्रको पोस्टर टाँसेर शहरको चक्कर लगाउदा दर्शकको ध्यान केन्द्रित गर्न सफल भएको थियो ।

इटहरीमा पत्रकार भेटघाट गरेपछि टिम दमकतर्फ लागेको थियो । दमकमा प्रेसमिट गरेपछि निर्माण टिम राजधानी फर्किएको हो । अब निर्माण पक्षले काठमाडौँ उपत्यकामा प्रचारका कार्य गर्नेछ । मोफसल यात्रापछि काठमाडौं आइपुगेका निर्देशक पौडेलले मोफसलमा दर्शक र मिडियाको न्यानो साथ पाएको, चलचित्रलाई लिएर दर्शकहरु उत्साहित रहेको भन्दै खुशी व्यक्त गरे ।

पौडेलले भने, ‘मोफसलको सफल भ्रमण सकाएर काठमाडौं आइपुगेका छौं । उपत्यका बाहिरका दर्शकसंग आत्मियता साट्न पायौं । उहाँहरू चलचित्रलाई लिएर निक्कै उत्साहित हुनुहुन्छ । मिडियाकर्मीबाट पनि राम्रो साथ पायौँ । आशा छ दर्शकले हलमा पनि साथ दिनु हुन्छ होला ।’  ​

पौडेलले एउटा राम्रो लभस्टोरी चलचित्र बनाएको भन्दै पुष २९ देखि हल पुगेर हेरिदिन आग्रह गरे ।

प्रेमकथामा आधारित चलचित्रको ट्रेलर र गीत संगीतले दर्शकको राम्रो साथ र प्रतिक्रिया पाएकाले चलचित्रले पनि राम्रो प्रतिक्रिया पाउनेमा निर्माण टिम आशावादी देखिएको छ ।

चलचित्रमा पुष्प, साम्राज्ञी र सन्दीपसंगै सरोज खनाल, खड्क बहादुर पुन, दिपिशा केसीलगायतका कलाकारहरूको अभिनय छ । 

सबिर श्रेष्ठ र बाबुराम निरौलाको स्क्रिप्टमा निर्माण चलचित्रमा शिव ढकालको छायांकन, सुवाष भुषाल÷योगेश काजीको संगीत, रामजी लामिछानेको कोरियोग्राफी र भुपेन्द्र अधिकारीको सम्पादन रहेको छ । 

सबिर श्रेष्ठको लेखन तथा कार्यकारी निर्माण रहेको चलचित्रमा पासाङ लामा, अर्नव पौडेल र आर्यन पौडेलको लगानी रहेको छ ।

चलचित्रको सह–निर्मातामा नीरु भण्डारी, अशोक पोखरेल, सुमन पौडेल र सुधिर पराजुली रहेका छन् ।