३१ जेठ २०८३, आइतबार
अमेरिकाको टेक्सस राज्यमा एक शिक्षिकाले आफ्ना विद्यार्थीहरूलाई कक्षाकोठाभित्रै झगडा गर्न प्रोत्साहित गरेपछि उनलाई विद्यालयले निष्काशन गरेको छ ।
नेटली गार्सिया नामक ती शिक्षिकाले बालबालिकाको ज्यान जोखिममा पारेको भन्दै पक्राउ समेत गरिएको छ । गत साता गार्सियाले चारजना विद्यार्थीलाई झगडा गर्न दिएर शारीरिक चोटपटकको जोखिममा पारेकी थिइन् ।
कक्षाका १२ र १३ वर्षका बालबालिकालाई लड्नका लागि उनले नियम समेत बनाएकी थिइन् । केही विद्यार्थीलाई ढोकामा उभिएर सुरक्षा चियो गर्न समेत उनले लगाइन् ।
घटनाको भिडियोमा चारजना विद्यार्थीले झगडा गरेको देखिन्छ । लडाइँ शुरू हुनुअघि शिक्षिकाले ३० सेकेन्ड भनेको सुनिन्छ । झगडा हुँदै गर्दा टाइमरको आवाज आएको पनि सुनिन्छ ।
किम्बोरो मिडलस्कूलले ती शिक्षिकालाई जागिरबाट बर्खास्त गरेको जनाएको छ । उनी एक महिनाका लागि मात्र जागिर खान आएको पनि उसले जानकारी दिएको छ ।
विद्यालयले ती शिक्षिकाको बेहोरा असह्य भएको जनायो ।
