आफ्नो संगठनलाई चुस्त बनाउन नेकपा एमालेले ‘मिसन ग्रासरुट’ अभियान सञ्चालन गरिरहेका बेला तनहुँको उपनिर्वाचनमा एमालेको भोट घटेको छ ।

मंसिर ४ को चुनावमा झण्डै २० हजार पाएको ठाउँमा एमालेले उपनिर्वाचनमा भने ८ हजार भोट पाएको छ । 

मंसिर ४ को प्रतिनिधिसभा निर्वाचनमा एमाले उम्मेदवार एकबहादुर राना १९ हजार ९ सय ८१ मत पाएर दोस्रो भएका थिए । विजयी नेपाली कांग्रेसका रामचन्द्र पौडेलले २५ हजार ३ सय ६१ मत पाएका थिए । त्यो बेला पनि एमालेले सत्ता गठबन्धनको सामना गरेको थियो । 

५ महिनापछिको उपनिर्वाचनमा सर्वेन्द्र खनालले एमालेको ११ हजार ४ सय ९३ भोट घटाएका छन् । खनालले ८ हजार ४ सय ८८ मत पाए ।

विजयी रास्वपाका स्वर्णिम वाग्लेले ३४ हजार ९ सय २१ मत पाएका छन् । एमाले उम्मेदवारभन्दा रास्वपाले पाएको मत ४ गुणा बढी छ । 

मंसिर ४ को चुनावमा काठमाडौं– ६ मा पराजित खनाललाई एमालेले तनहुँ १ मा उम्मेदवार बनाएको थियो । खनाललाई उम्मेदवार बनाइएकोमा स्थानीय नेता कार्यकर्ता रुष्ट थिए । खनाललाई उनीहरूले खुलेर समर्थन गरेनन् ।  

नेपाल प्रहरीको पूर्व महानिरीक्षक समेत रहेका खनाललाई जसपा सांसद डा. सुरेन्द्र यादवको अपहरणमा संलग्न भएको आरोप समेत लागेको थियो ।