अमेरिकाको लस एन्जलसबाट सिड्नी पुगेकी एक महिलाले लगेजमा सुन दलेको बन्दूक राखेको पाइएपछि पक्राउ गरिएको छ । 

ती महिलाले अस्ट्रेलियामा बन्दूक ल्याउन वा बोक्न अनुमति नलिएको अस्ट्रेलियन बोर्डर फोर्सले बयान जारी गरी बतायो । 

अस्ट्रेलियामा बन्दूक स्वामित्वसम्बन्धी नियम कठोर छ । पूर्व स्वीकृति विना कसैले पनि जानाजान बन्दूक वा हतियार लैजान पाउँदैन । यसको अधिकतम सजाय १० वर्षको कैद हुनेछ । 

नाम नखुलाइएकी ती महिला सोमवार स्थानीय अदालतमा पेश गरिएकी थिइन् । उनलाई धरौटीमा रिहा गरिएको छ ।

उनको प्रवेशाज्ञा तथा अस्ट्रेलियामा निरन्तर बसाइका विषयमा अदालतले निर्णय गर्नेछ । उनलाई देशनिकाला पनि गर्न सकिने एबीएफले जनाएको छ । 

ती महिलाले किन अन्तर्राष्ट्रिय यात्रामा समेत बन्दूक बोकेकी थिइन् भनी खुलेको छैन ।