युट्युबमा भ्युज बटुल्नका लागि विमान ठोकाएको स्वीकार, २० वर्षको कैद सजाय हुन सक्ने (भिडियो)

अमेरिकाका युट्युबर ट्रेभर जेकबले युट्युबमा विशाल भ्युज बटुल्नका लागि विमान दुर्घटना गराएको स्वीकार गरेका छन् । 

स्टन्ट गरेर युट्युबमा भिडियो राख्ने गरेका जेकबलाई संघीय प्रहरीको अनुसन्धानमा अवरोध गरेको आरोपमा २० वर्षसम्मको कैद सजाय हुन सक्ने बताइएको छ । 

क्लिक र भ्युजका लागि जेकबले विमान दुर्घटनाको प्य्रांक गराएका थिए तर विमान साँच्चिकै दुर्घटनाग्रस्त भयो । उनी क्यालिफोर्नियाको लोम्पक सिटी विमानस्थलबाट एक्लै प्लेन चलाएर म्यामथ लेक्स पुग्न खोजेका थिए । तर उडेको ३५ मिनेटमा उनले विमानमा प्राविधक गडबडी आएको भन्दै विमानबाट हाम्फालेका थिए । यस क्षणलाई उनको गोप्रो क्यामराले कैद गरेको थियो । 

प्याराशुटका साथ जेकब सुरक्षित रूपमा भुइँमा झरेका थिए भने विमान चाहिँ लोस पाद्रेस राष्ट्रिय वनमा दुर्घटनाग्रस्त भएको थियो । 

उनको यस स्टन्टलाई उड्डयनविद् तथा संघीय निकायहरूले निगरानी गरिरहेका थिए । उनीहरूले जेकबको भिडियोलाई मसिनो गरी विश्लेषण गर्दा कैयौं कुरा नमिलेको पाए । त्यसपछि राष्ट्रिय यातायात सुरक्षा बोर्ड र संघीय उड्डयन प्रशासनले अनुसन्धान शुरू गरे । 

जेकबले दुर्घटनाग्रस्त भएको विमानका टुक्राटाक्रीलाई लोम्पक सिटी विमानस्थलमा लुकाएर पछि नष्ट गरेका थिए । यसरी उनले प्रमाण नष्ट गर्ने प्रयास गरेको भन्दै संघीय निकायले उनीमाथि गम्भीर मुद्दा चलाउने भएको छ । उनलाई २० वर्षको कैद सजाय दिइने सम्भावना छ । 

यत्तिका दुःख गरेर भिडियो बनाए पनि त्यसले ३९ लाख भ्युज मात्र पाएको छ ।