समीक्षा अधिकारीले १३ वर्षको उमेरमा ‘बालापनको उमेर’बोलको फिल्मी गीत गाएर सांगीतिक क्षेत्रमा पाइला राखेकी थिइन् । 

उनले गाएको पहिलो गीत नै सुपरहिट भयो । उनको व्यस्तता भने ‘माया मारेर’बोलको गीत गाएपछि बढेको हो । उक्त गीत गाएपछि समीक्षाले दैनिक ५ वटासम्म गीत  रेकर्ड गराउने गरेकी थिइन् । स्टेजसम्म उनी छाउने गरेकी थिइन् । उनका ‘नबोली नबोली’, ‘धनगढीको बसमा’, ‘पछयौरी लिसियो’, ‘सुर्ति माड्दै माड्दै’ जस्ता थुप्रै गीतले बजार पिटेका थिए । 

साङ्गीतिक करिअरले लोभलाग्दो उचाइ लिइरहेको समयमा व्यक्तिगत जीवनसँग जोडिएको घटनाले गर्दा उनी डेढ वर्षअघिबाट समस्यासँग गुज्रिन पुगिन् । सामाजिक सञ्जालमा उनीविरुद्ध गाली प्रहार हुन थाल्यो । उनले गीत गाउन दिनेहरू देखिएनन् । स्टेज कार्यक्रमतिर उनको डिमाण्ड ठप्पै हुन पुग्यो । तर, पछिल्लो केही समययता समीक्षा पहिलेझैँ व्यस्त बन्न थालेकी छन् । 

अहिले समीक्षाले हरेक दिन नयाँ-नयाँ गीत रेकर्ड गराइरहेकी छिन् । चर्चित कलाकारहरूसँग उनले गीत गाइरहेकी छिन् । बिहीवारमात्रै उनले ४ वटा गीत रेकर्ड गराएको जानकारी दिएकी छिन् । उनले स्वर दिनका गीतहरू दिनहुँजसो युट्युबमा सार्वजनिक हुन थालेका छन् । शुक्रवारमात्रै पनि उनको स्वरमा पशुपति शर्माको चर्चित गीत ‘आफ्नो आफ्नो दुःख’को फिमेल भर्सन सार्वजनिक भएको छ ।