नयाँ लोकेसनमा खिचियो ‘जुठे’, भोलिबाट प्रसारणमा आउने

झन्डै दुई महिनादेखि रोकिएको सामाजिक टेलिसिरियल ‘जुठे’ भोलिबाट प्रसारणमा आउने भएको छ । 

निर्माण टिमले सोमवार बेलुका राजधानीमा पत्रकार भेटघाट कार्यक्रमको आयोजना गर्दै बुधवारबाट टेलिसिरियल प्रसारणमा आउने जानकारी दिएको हो । 

बेलुका ८ः३० बजे हिमालय टीभीमा प्रसारणमा आउने टेलिसिरियल युट्युबमा भने अब ओएसआर डिजिटलमार्फत सार्वजनिक हुनेछ ।

यसअघि ‘मास्टर टीभी’ युट्युबमा सिरियल सार्वजनिक हुने गरेको थियो । 

लेखक एवं निर्देशकमध्येका एक मरिचमान श्रेष्ठ ‘बल्छी धुर्वे’का अनुसार सिरियलमा दर्शकले अब नयाँ लोकेसन पाउनेछन् । 

लोकेसन सिफ्ट गर्नुपर्ने भएकै कारण पनि रोकिएको सिरियल प्रसारणमा ल्याउन ढिला हुन गएको उनले प्रष्टयाए । 

‘तपाईहरूले हेरिरहनुभएको जुठे पहिलेको जस्तै कथामा आउनेछ । कलाकारहरू उही हुनेछौँ । लोकेसन परिवर्तन गर्दै लमजुङकै नयाँ ठाउँमा छायांकन गर्न थालेका छौँ । विगतमा जस्तै माया गरि दिनुहुनेछ भन्ने आशा लिएका छौँ’ उनले भने । 

अर्का लेखक एवं निर्देशक राजु पौडेलका अनुसार सिरियलको ६ भाग छायांकन गरिएको छ । आगामी भागमा दर्शकबाट पहिलेको भन्दा अझ माया पाउने आशा राखेको उनले बताए । 

पौडेलले भने, ‘१ सय १९ भागमा रोकिएको जुठे अब १ सय २० भागबाट नियमित प्रसारणमा आउनेछ । हामीले धेरै मेहनत गरेर फेरि जुठे ल्याउँदै छौँ । मेहनतलाई दर्शकहरूले बुझ्नुहुनेछ भन्ने विश्वास लिएका छौँ ।’

कार्यक्रममा बोल्दै सिरियलका कलाकारहरू रवि गिरी, विद्या कार्की, शर्मिला शर्मा, सरिता ढुंगाना लगायतले पनि दर्शकबाट मायाको आशा राखे ।