काठमाडौंमा फेरि गुण्डागर्दी मौलाएको छ, तर प्रहरीले भने नदेखेझैँ गरिरहेको छ । नुवाकोटको ककनी गाउँपालिका–५ का सानुभाइ भनिने युवराज गुरुङले गुण्डागर्दी मच्चाउन थालेका हुन् ।

माघ ५ गते शुक्रवार राति ३ बजेर ३६ मिनेटमा गुण्डा नाइके सानुभाइ भनिने युवराज गुरुङले छायाँ सेन्टरमा रहेको प्ले ब्वाइ क्लबमा एक व्यक्तिलाई मरणासन्न हुने गरी कुटिपट गरेका छन् । तर, प्रहरी त्यसमा मौन छ ।  सार्वजनिक स्थानमा भएको हातपातमा सेक्युरिटी गार्डहरू पनि मौन देखिन्छन् । 

लोकान्तरलाई प्राप्त भिडियोमा राति पार्किङ स्थलमा सानुभाइसहित ७/८ जनाको समूहले कुटपिट गर्दा त्यहाँ भएका सेक्युरिटी गार्डहरू मौन देखिएका छन् ।

प्रहरी इन्काउन्टरमा मारिएका कुमार घैँटेका मुख्य सहयोगीका रूपमा रहँदै आएका गुण्डा नाइके सानुभाइले पछिल्लो केही महिनामा ४/५ ठाउँमा आफ्नो गुण्डागर्दी मच्चाएका छन् । उनले असार महिनामा ठमेलको ओम्निया क्लबका सञ्चालकमाथि कुटपिट गरेको भिडियो सार्वजनिक भएको थियो । 

प्रहरी स्रोतलाई मान्ने हो भने अहिले सानुभाइले प्रहरीकै संरक्षणमा गुण्डाराज चलाइरहेका छन् । उनलाई प्रहरीकै केही अधिकारीले आफ्नो गाडीमा राखेर हिँडाउने गरेको आरोप लागेको छ ।

‘अहिले उपत्यकामा केही प्रहरी अधिकारीहरूको सरुवा भएर आएपछि फेरि उसको गुण्डागर्दी अलि बढि भएको छ । अहिले दैनिकजसो ठमेल दरबारमार्गलगायत क्षेत्रका क्लबमा उनीहरूले गुण्डाराज मच्चाउँदै आएका छन्,’ प्रहरीकै एक अधिकारीले लोकान्तरसँग भने ।

२०६७ सालमा नुवाकोटका निर्माण व्यवसायी अनिल श्रेष्ठलाई गोली प्रहार गरेको आरोप सानुभाइमाथि छ । उनलाई त्यतिबेला महानगरीय प्रहरी वृत्त महाराजगञ्जले ज्यान मार्ने उद्योगमा पक्राउ गरेको थियो । त्यसबाट छुटिसकेका पछि उनी दरबारमार्ग वृत्तबाट बैकिङ कसूरमा पक्राउ परेका थिए ।

पछि २०७२ सालमा प्रहरीले उनलाई बुलेटप्रुफ ज्याकेटसहित हिँडिरहेको अवस्थामा पक्राउ गरेको थियो । उनको साथबाट प्रहरीले लोड गरिएको पेस्तोल समेत बरामद गरेको थियो । त्यसपछि जिल्ला प्रहरी कार्यालय नुवाकोटले हातहतियार तथा खरखजनामा ०७२ पुस २५ गते मुद्दा दायर गरेको थियो । 

उपत्यकाको सुरक्षा हेर्नका लागि उपत्यका प्रहरी कार्यालय रानीपोखरी, काठमाडौं प्रहरी परिसर र १४ वटा वृत्त हुँदा पनि ५ गते राति भएको घटना बाहिर नआउनुले प्रहरी अधिकारीहरूको संरक्षण पुष्टि हुने एक प्रहरी अधिकारीले बताए ।

‘तपाईं आफैं भन्नुस्, उपत्यका मेट्रो, किलो हुँदै वृत्तहरू हुँदा पनि सार्वजनिक ठाउँमा भएको घटना बाहिर नआउने हुन्छ त ?’ ती अधिकारीले लोकान्तरसँग भने । 

तर, काठमाडौं प्रहरीले भने आफूहरूले कुनै पनि खालका गुण्डागर्दी गर्नेलाई शिर ठाडो पार्न नदिने दाबी गर्दै आएको छ । काठमाडौं उपत्यका प्रहरी कार्यालय (मेट्रो)को कमान्ड सम्हाल्दै गर्दा प्रहरी अतिरिक्त महानिरीक्षक (एआईजी) दीपक थापाले कुनै पनि खालका गुन्डाहरूलाई चहलपहल गर्न नदिने बताएका थिए ।

मेट्रोका प्रवक्ता वरिष्ठ प्रहरी उपरीक्षक (एसएसपी) दिनेशराज मैनालीले उपत्यकामा कुनै खालका गुण्डागर्दी  गर्नेलाई नछाड्ने दाबी गरे  । ‘हामीले कुनै पनि खालका गुण्डा नाइकेहरूको शिर ठाडो पार्न दिँदैनौं, त्यस्ता खालको कुनै आएका छन् भने कानूनी दायरामा आउँछन्,’ एसएसपी मैनालीले लोकान्तरसँग भने । उनले माघ ५ गते छायाँ सेन्टरको प्ले ब्वाइ क्लबमा भएको घटनाको विशेष सूचना नभएको बताए । 

तर, काठमाडौं प्रहरी परिसरका प्रमुख वरिष्ठ प्रहरी उपरीक्षक (एसएसपी) भूपेन्द्र खत्रीले छायाँ सेन्टरको प्ले ब्वाइ क्लबमा भएको घटनाको बारेमा जानकारी भएको र अहिले कुटपिट गर्ने समूहको खोजी भइरहेको बताए । ‘हामीलाई जानकारी छ, यसभन्दा अगाडि पनि प्रहरीले पक्राउ गरेको हो, अहिले फरार छ, हामीले खोजी गरेका छौं,’ एसएसपी खत्रीले लोकान्तरसँग भने ।

हेर्नुहोस्, कुटपिटको भिडियो :