सरकार गठनमा ‘मेकर’का रुपमा उभिएका राजीव गुरुङ उर्फ दीपक मनाङेले फेरि एकपटक बाजी मारेका छन् ।

गण्डकीमा सरकार ढलाउन र बनाउन भूमिका खेलेका मनाङे यसपटक अल्पमतमा रहेको मुख्यमन्त्री सुरेन्द्रराज पाण्डे सरकारको भौतिक पूर्वाधार तथा यातायात मन्त्री बनेका  हुन् । चौथो पटक मन्त्री बनेका उनले आजै प्रदेश प्रमुख समक्ष पद तथा गोपनीयताको शपथ लिएका छन्।

गण्डकीलाई मध्यावधिमा जान नदिन सरकारलाई साथ दिएको उनको तर्क छ । सरकार जोगाउन साथ दिएको तर्क दिएका मनाङेले मन्त्री उपहार पाउँदै आएका छन् ।

सत्ताको जोड घटाउमा प्रमुख खेलाडी बनेका मनाङे आफ्नो सत्तामोह छोप्न तर्क दिँदै आउँछन् ‘मध्यवधि’बाट प्रदेशलाई जोगाउने । सोमवार मन्त्री पदको शपथ लिएपछि पनि उनको भनाइ सोही थियो । 

‘मध्यावधिमा जानै दिन्न । गए पनि म चुनावमा भागै लिन्न', पत्रकारसँग कुराकानी गर्दै उनले भने ।

सत्तापक्षमा रहिरहन मनाङेले कुनै कसरत बाँकी राख्दैनन् भन्ने यसअघिका उनको कदमबाट प्रष्ट भइसकेको छ ।

मनाङ (ख)बाट पुनः निर्विरोध स्वतन्त्र निर्वाचित बनेका उनले मन्त्री बन्नका लागि कसरत गरिरहेकै थिए । सत्ता गठनमा उनको आवश्यकता नभएपछि थन्किएका मनाङे गण्डकीमा सुरेन्द्रराज नेतृत्वको गठबन्धन सरकार आइसकेपछि मन्त्री बन्न कसरत शुरू गरे । यतिसम्मकि सत्ता गठनको भागबन्डामा गण्डकीमा एकीकृत समाजवादीबाट मन्त्री पद पाउने आशामा समाजवादी प्रवेश गरे । उनले सोचे जस्तो भएन ।

तर समाजवादीका अध्यक्ष माधवकुमार नेपालले मनाङेलाई गण्डकी सरकारमा सामेल नगराउँदा आपत्ति जनाएका थिए । केही महिना अघि पोखरामा भएको एक पत्रकार सम्मेलनमा नेपालले मुख्यमन्त्रीलाई आफ्नो पार्टीका सांसदलाई सरकारमा सामेल गराउन आग्रह गरिरहेको बताएका थिए । 

हिजो आइतबार उनै सांसद प्रदेश सचिवालयमा आफू स्वतन्त्र रहेको जानकारी गराउँदै निवेदन पेश गरे । त्यसको २४ घण्टा बित्न नपाउँदै गण्डकीको मन्त्रिपरिषद्‌मा सहभागी भएका छन् ।

अल्पमतमा रहेका मुख्यमन्त्रीले सरकार जोगाउन मनाङेलाई साथमा लिए पनि सहज भने छैन । मुख्यमन्त्रीलाई सरकार जोगाउन राप्रपाका दुई सांसद सहित अर्का एक सांसदको साथ आवश्यक पर्छ । गण्डकीमा बाबुराम भट्टराई निकट सांसद फडिन्द्र देवकोटा माओवादी केन्द्रको चुनाव चिन्ह लिएर सांसद निर्वाचित छन् । हालको परिवेशमा सम्भवतः सुरेन्द्र सरकारले उनको साथ पाउने सम्भावना छ । 

राप्रपालाई कसलाई साथ दिन्छ निर्णय भइसकेको छैन । मन्त्री पद उपहार लिएर मध्यावधि जोगाउन लागेको बताउने मनाङेले सत्ता टिकाउन मुख्यमन्त्री काम गर्नुपर्ने बताए । 

‘मेरो त कामपनि होइन मुख्यमन्त्रीको हो । उहाँको सत्ता टिकाउन उहाँले गर्ने हो । मैले उहाँलाई मध्यावधि नजाऊ भनेर एउटा चान्स दिएकै हो,’उनले भने,‘यो भन्दा राप्रपालाई मध्यावधि चाहिन्छ भने म फेस गर्छु । तर, म चुनाव लड्दिनँ ।’ 

सत्ता टिकाउन खेलाडी बनेका मनाङे यसअघि दुईपटक तत्कालीन मुख्यमन्त्री पृथ्वीसुब्बा गुरुङ र नेपाली कांग्रेसबाट मुख्यमन्त्री बनेका कृष्णचन्द्र नेपालीको सरकारमा एकपटक मन्त्री बनेका थिए । उनी यसअघि तीनै पटक मन्त्री बन्दा सरकार बनाउने र ढलाउने भूमिकामा रहे । गण्डकीको मन्त्रीमा पहिलोपटक २०७८ वैशाख १६ गते मनाङे मन्त्री नियुक्त भएका थिए । 

त्यससमय अल्पमतमा रहेका पृथ्वीसुब्बाले सरकार टिकाउन मनाङेलाई खेलकुद मन्त्री थमाएका थिए । त्यसपछि २०७८ जेठ ९ मा उनी पृथ्वीसुब्बाको सरकारमा पुनः मन्त्री नियुक्त भएका थिए ।

ठूलो दलको हैसियतमा वैशाख २९ गते गण्डकीको मुख्यमन्त्रीमा पृथ्वीसुब्बाले सरकार जोगाउन सफल बनेपछि उनको क्याबिनेटमा मनाङेले स्थान पाएका थिए ।

त्यसको ४५ दिनभित्र नै मनाङेले पृथ्वीसुब्बाको साथ छोडेर गण्डकीमा नेपाली कांग्रेसको सरकार बनाउन सहयोग गरे । २९ जेठमा तत्कालीन मुख्यमन्त्री कृष्णचन्द्र नेपाली नेतृत्वको सरकारमा उनी तेस्रोपटक खेलकुद मन्त्री बनेका थिए ।

खेलकुद मन्त्री बनेका मनाङेले त्यससमय भौतिक पूर्वाधार मन्त्रालय खोजेका थिए । तर भौतिक मन्त्रालय तीनपटकसम्म उनको हातमा परेन । चौथोपटकमा भने उनले आफूले खोजेको मन्त्रालय पाएका छन् । 

‘देशको ७० प्रतिशत बजेट भौतिकमा हुन्छ । सबैभन्दा ठुलो भ्रष्टाचार पनि भौतिकमा हुन्छ । मलाई चार/पाँच दिनको समय दिनुहोस् । म कसरी पेल्छु', उनले भने, ‘७० प्रतिशत बजेट भएको मन्त्रालय मैले ताकेको कारण नै त्यही हो । मैले कमाउनलाई होइन । चेताउनलाई हो काम त गर्नपर्‍यो नि ।’

६० सदस्यीय गण्डकीमा बहुमतका लागि ३१ सांसद आवश्यक पर्छ ।

प्रदेशमा केन्द्रको गठबन्धनअनुसार कसैसँग स्पष्ट बहुमत छैन । सदनमा कांग्रेसका २७, एमालेका २२, माओवादी केन्द्रका ८, राप्रपाका २ र एक स्वतन्त्र सांसद छन् ।