२८ असार २०८३, आइतबार
वि.सं. २०१२ मा हनुमानढोका परिसरमा स्थापित जिल्ला प्रहरी कार्यालय काठमाडौंले ६९ वर्षपछि अत्याधुनिक भवन पाएको छ ।
स्थापनाकालमा प्रहरी नायव उपरीक्षक (डीएसपी) को दरबन्दी रहेको यस कार्यालयमा अहिले प्रहरी वरिष्ठ उपरीक्षक (एसएसपी) को नेतृत्व छ ।
डीएसपीको अन्तिम दरबन्दीमा सर्वेन्द्र खनाल (अवकाशप्राप्त प्रहरी महानिरीक्षक)ले नेतृत्व गरेका थिए ।
हनुमानढोकाले २०६२/०६३ मा प्रहरी उपरीक्षक (एसपी) को दरबन्दी पायो । ३ रोपनी १ पैसा जग्गामा सीमित रहेको यस कार्यालयले २०६८ मा एसएसपीको दरबन्दी पाएको थियो ।
एसएसपी राजेन्द्र श्रेष्ठले बोर्डमा नाम लेखाएर केही समय काम गरे पनि दरबन्दीसहितको सरुवा भएर पुगेका थिए, जयबहादुर चन्द (अवकाश प्राप्त एआईजी, हाल अख्तियार दुरुपयोग अनुसन्धान आयोगको आयुक्त) । त्यसबेलादेखि अहिलेसम्म एसएसपीकै दरबन्दी छ ।
२०७२ वैशाख १२ गतेको महाभूकम्पपछि हनुमानढोकास्थित कार्यालय टेकु सर्यो ।
नेसनल ट्रेडिङको गोदाम र आयल निगमको कार्यालयमा सरेको प्रहरीले झण्डै ९ वर्ष कष्टपूर्ण तवरले जनगुनासो सम्बोधन गर्दै आएको थियो ।
अपराध अनुसन्धानका लागि ल्याइएका थुनुवा र सेवाग्राहीका उजुरीउपर अनुसन्धान गर्न प्रहरीले पालमुनि बसेर काम गर्दै आएको थियो ।
बर्खामा पानी चुहिँदा पनि शान्ति सुरक्षाका लागि अहोरात्र खटिएको काठमाडौं प्रहरीले भद्रकालीमा अत्याधुनिक भवन पाएको छ ।
भवनको उद्घाटन सोमबार प्रधानमन्त्री केपी शर्मा ओलीले गरे ।
२०७६ असार १० मा ओली आफैं प्रधानमन्त्री हुँदा जग्गा खरिद गर्न र भवन बनाउन १ अर्ब २६ करोड ७४ लाख रुपैयाँ बजेट छुट्याइदिएका थिए ।
उनै ओलीले सोमबार प्रधानमन्त्रीकै हैसियतमा भवन उद्घाटन गरे ।
२०७६ भदौ २४ गते भवनको शिलान्यास तत्कालीन प्रहरी महानिरीक्षक सर्वेन्द्र खनालले गरेका थिए ।
उद्घाटन समारोहमा सम्बोधन गर्दै ओलीले भने, ‘त्यो हनुमानढोकामा म कयौं रात थुनिएको छु । त्यहाँका उडुससँग मेरो चिनजान थियो ।’
प्रधानमन्त्री ओलीले निर्दोषलाई दोषी करार गर्ने काम नगर्न प्रहरीलाई निर्देशन दिए ।
उनले सरुवा–बढुवाका लागि झोला/थैला बोकेर नदौडिन पनि आग्रह गरे । प्रहरीलाई स्रोतसाधन सम्पन्न गराउन सरकार तयार रहेको उनको भनाइ थियो ।
हनुमानढोकामा कार्यालय हुँदा थुनुवा कक्ष साघुँरो थियो । त्यतिबेला प्रहरी वृत्तबाट मुद्दा चल्दैनथ्यो ।
एउटै मात्र कार्यालयले मुद्दा चलाउँदा दैनिक सयदेखि डेढ सय थुनुवा हुन्थे । अहिले ३ सय २० जना थुनुवा अट्ने हिरासत कक्ष छ ।
१० तले भवनमा ५२ वटा कार्यकक्ष, २१ वटा स्टोर रुम, सय जना प्रहरी सुत्न मिल्ने ब्यारेक, ३२० जना अट्ने थुनुवा कक्ष, २५ जना सिनियर प्रहरी अधिकृत कार्यकक्ष र ब्यारेक छन् ।
त्यस्तै, बेसमेन्टमा ५७ वटा चारपाङ्ग्रे र २२० वटा मोटरसाइकल अट्ने पार्किङ बनाइएको छ ।
पानी निकाल्न डिपबोरिङ र वाटर ट्रिटमेन्ट प्लान्ट बनाइएको छ ।
त्यस्तै, आर्टिफिसियल इन्टलिजेन्ससहितको १०८ वटा सीसीटीभी क्यामेरा जडान गरिएको छ ।
प्रहरी मुख्यालयकै भौतिक पूर्वाधार निर्देशनालयका इन्जिनीयरबाट नक्सा बनाएर भवन निर्माण थालिएको थियो ।
भवन उद्घाटनका क्रममा मन्तव्य राख्दै गृहमन्त्री रमेश लेखकले अत्यन्त सीमित स्रोतसाधनमा असीमित काम गर्नुपरेको बताए ।
उनले प्रहरीलाई निर्देशन दिँदै भने, ‘जनताको मुद्दा बोक्नुस्, जनताको मुद्दा त्यो कुनामा राखेर आफ्नो मुद्दा बोकेर हिँड्नुभएन, मेरो मात्र मुद्दा छ, जनताको मुद्दा छैनन् नभन्नुहोला ।’
