सिरहाको लहान नगरपालिकाले किसानलाई ५० प्रतिशत अनुदानमा उन्नत जातको गहुँको बीउ वितरण गर्न थालेको छ ।

आर्थिक वर्ष २०८१/८२ को कृषि प्रसार कार्यक्रमअन्तर्गत मंगलबारदेखि किसानलाई अनुदानमा गहुँको बीउ वितरण शुरू गरिएको कृषि विकास अधिकृत प्रकाश साह हलुवाईले जानकारी दिए । 

उनले कृषकले गहुँको बीउ लिन सम्बन्धित वडा कार्यालयबाट निर्धारित परिमाणसहितको सिफारिस पत्र आवश्यक पर्ने र एक हप्तासम्म बीउ वितरण जारी रहने बताए । 

प्रतिकिलोग्राम ८५ रूपैयाँ रहेको बीउको मूल्य ५० प्रतिशत अनुदानमा ४२ रुपैयाँ ५० पैसा तोकिएको छ । 'यसमा गहुँको ढुवानी खर्च नगरपालिकाको रहनेछ । बीउको आधा मूल्य मात्र किसानले तिरे पुग्छ', नगरपालिकाका कृषि विकास अधिकृत हलुवाईले भने ।

नगरपालिकाले कृषि सामग्री कम्पनी लिमिटेड शाखा कार्यालय लहानबाट कूल २१ मेट्रिक टन बीउ खरिद गरेर किसानलाई वितरण गर्न लागेको हो । गत आवमा पनि नगरले १० मेट्रिक टन बीउ खरिद गरी किसानलाई वितरण गरेको अधिकृत हलुवाईले बताए । ​

नरपालिकाभित्र अनुमानित एक हजार सात सय हेक्टर जग्गामा गहुँखेती गरिन्छ । उक्त जग्गामा लगाइने गहुँखेतीका लागि नगरपालिकाको २१ मेट्रिक टन बीउ पर्याप्त नभए पनि अघिल्लो वर्ष सोही गहुँको बीउ खेती गरेका किसानले आफैं जगेर्ना गरेको बीउबाट पुर्ताल हुने जनाइएको छ ।