नेपाल स्टक एक्सचेञ्ज (नेप्से)को प्रमुख कार्यकारी अधिकृत (सीईओ) पदका लागि १० जनाले आवेदन दिएका छन् । नेप्सेको सीईओका लागि आवेदन दिने अन्तिम दिन आइतबार साँझसम्म १० जनाको आवेदन परेको हो । 

गत साता मात्रै नेप्सेको सीईओ पदका लागि पुनः आवेदन दिने म्याम थप गरिएको थियो । त्यसअघि गत फागुन १२ देखि १८ सम्म आवेदन माग गर्दा आवेदन नै परेको थिएन । अर्थ मन्त्रालयका सहसचिव सेवन्तक पोखरेलको संयोजकत्वमा गठित छनोट समितिले आइतबारसम्म अन्तिम आह्वान गरेको थियो । 

सीईओका लागि अर्थशास्त्र, वाणिज्यशास्त्र, वित्तशास्त्र, व्यवस्थापन सूचना प्रविधि वा वाणिज्य वा कानून विषयमा मान्यताप्राप्त शिक्षण संस्थाबाट कम्तीमा स्नातकोत्तर वा चार्टर्ड एकाउन्टेन्सी वा सो सरहको उपाधि हासिल गरेको हुनुपर्ने व्यवस्था छ । 

साथै, पूँजी बजार वा वित्तीय क्षेत्र वा व्यवस्थापनसम्बन्धी कार्यमा कम्तीमा सात वर्ष उच्च व्यवस्थापकीय तहमा काम गरेको अनुभवसहित कम्तीमा १५ वर्षको कार्य अनुभव हुनुपर्ने व्यवस्था छ ।

तत्कालीन सीईओ कृष्णबहादुर कार्कीको पदावधि सकिएपछि गत माघ २५ देखि नेप्सेको सीईओ पद खाली छ ।