लामो समयदेखि काठमाडौं महानगरपालिकाभित्र कबाड संकलनमा अवरोध भइरहेको भन्दै काठमाडौंका प्रमुख जिल्ला अधिकारी ऋषिराम तिवारीलाई ज्ञापनपत्र बुझाइएको छ ।

बिहीबार कबाड व्यवसायी संघर्ष समितिको तर्फबाट कबाड व्यवसायी समाजले सीडीओ तिवारीलाई ज्ञापनपत्र बुझाएको हो । 

समाजले काठमाडौं महानगरपालिकाले काठमाडौं महानगर क्षेत्रभित्र साइकलमा कबाड संकलन गर्दै आएका कबाड संकलकहरूको साइकल र समान जफत गर्ने गरेको भन्दै त्यसलाई तत्काल रोक्न सीडीओसँग माग गरेको छ । 

साइकलमा कबाड संकलन गर्दै आएका संकलकलाई भइरहेको गालीगलौज कुटपिट र अभद्र व्यवहार बन्द गर्नुपर्ने  माग छ । हालसम्म कबाड संकलकका एक हजार थान साइकल काठमाडौं महानगर प्रहरीले जफत गरेको भन्दै समाजले उक्त साइकल र जफत गरेको समान फिर्ता गुर्नपर्ने बताएको छ । 

महानगर प्रहरीका कारण कबाड संकलकहरूले आफ्नो रोजगारी गुमाउनु परेको समाजले बताएको छ । आफ्नो पेशा व्यवसाय गर्न पाउने हकको सुनिश्चित गुर्नपर्ने समाजको माग छ । 

‘उक्त साइकल र समान फिर्ता नगरे हामी महानगर प्रहरीविरुद्ध प्रतिकार गर्नेछौं । महानगर प्रहरीका कारण संकलकहरूले आफ्नो रोजगारी गुमाउनु परेको छ’, समाजले प्रजिअ तिवारीलाई बुझाएको ज्ञापनपत्रमा भनिएको छ, ‘कबाड व्यवसायी र संकलकमाथि भइरहेको यो प्रकारको महानगर प्रहरीको अत्याचार गुन्डागर्दी तत्काल रोकिएन भने हामी कबाड व्यवसायी र कबाड संकलकहरूले महानगर प्रहरीको सशक्त प्रतिकार गर्ने कुरा यहाँलाई अवगत गराउन चाहन्छौं ।’

जसका कारण भोलिका दिनमा हुन सक्ने सम्भावित घटनालाई मध्यनजर गरी कबाड व्यवसायी र कबाड संकलकको जिउधनको सुरक्षाका लागि अनुरोध गरेको गरिएको समाजले भनेको छ ।