२८ असार २०८३, आइतबार
नेकपा एमाले विराटनगर महानगर कमिटीको सम्पन्न दोस्रो अधिवेशनमा इतर समूहले जीत निकालेको छ ।
केही समयअघि भएको जिल्ला अधिवेशनको झल्को दिनेगरी महानगर कमिटीको पदाधिकारीमा पनि इतर समूहले क्लिन स्वीप गरेको छ ।
महानगर कमिटीमा बलराम गिरी नेतृत्वको प्यानल नै विजयी भएको छ । सर्वसम्मत नेतृत्व छान्ने प्रयास असफल बनेपछि बिहीबार साँझ मतदान भएको मतदान । ३१४ प्रतिनिधि रहेकामा ३०८ मत खसेको थियो ।
अन्तिम मतपरिणाम अनुसार अध्यक्षमा बलराम गिरीले १७३ मत ल्याएर विजयी बन्दा संस्थापन समूहका उम्मेदवार रोहित कोइरालाले १२१ मत पाए ।
उपाध्यक्षमा सुरज न्यौपानेले १४५ मत ल्याउँदा उनका निकटतम प्रतिस्पर्धी राम पोख्रेलले १३६ मत प्राप्त गरे । पोख्रेल विराटनगर महानगरपालिका-८ का वडा अध्यक्ष समेत हुन् ।
सचिवमा विज्ञान चापागाईंले अत्यधिक मत ल्याएर निर्वाचित भएका छन् । चापागाईंले १८३ मत ल्याउँदा निकटतम नवराज काफ्लेले १०४ मत मात्रै पाएका छन् ।
उपसचिवमा पनि इतर समूहकै हमिद आजाद निर्वाचित भएका छन् । उनले १७८ मत प्राप्त गरेका छन् भने चन्द्र शेखर विश्वासले ९८ मत मात्रै पाए ।
महिला उपसचिवमा हिमा मैनाली पोखरेल निर्वाचित भएकी छन् । कला डाँगीलाई पराजित गर्दै उनले जीत निकालेकी हुन् । पोख्रेलले १६९ मत प्राप्त गरेकी छन् भने डाँगीले १११ मत पाएकी निर्वाचन समितिले जनाएको छ ।
यो अधिवेशन संस्थापन पक्षका लागि गम्भीर झट्का बनेको छ । जिल्ला अधिवेशनदेखि सक्रिय भूमिका खेलेका नेता विनोद ढकालले संस्थापनलाई दोस्रो झट्का दिएका हुन् ।
उनी पूर्वराष्ट्रपति विद्यादेवी भण्डारी निकटका नेताका रूपमा पनि चिनिन्छन् । यसअघि जिल्ला अधिवेशनमा पनि ढकाल समूहकै अजम्बर राई नेतृत्वले पदाधिकारीमा क्लिन स्वीप गरेको थियो ।
मोरङका १७ पालिकामध्ये १३ पालिकामा अधिवेशन सकिएको छ । अधिकांश पालिकामा ढकालले नेतृत्व गरेको समूहले जीत निकालेको छ ।
महानगर अधिवेशनको उद्घाटन समारोहमै प्रदेश नेता पर्शुराम बस्नेतले ढकाललाई ‘अवैधानिक नेता’ भन्ने आरोप लगाएका थिए । अवैधानिक नेतालाई बोल्न नदिने भनेपछि ढकालले को अवैधानिक ? भनेर प्रश्न गरेका थिए ।
एमाले अध्यक्ष एवं प्रधानमन्त्री केपी शर्मा ओलीका विश्वास पात्र मानिएका बस्नेतले अवैधानिक भनेपछि ढकाल मञ्च छाडेर हिँडेका थिए । तर, पछि कार्यकर्ताले उनलाई रोकेका थिए । उनी मञ्च छाडेर कार्यकर्ता बसेकै ठाउँमा बसेका थिए ।
अधिवेशनको उद्घाटनमा महानगर इन्चार्ज समेत रहेका बस्नेतले विराटनगरकै विग होटलका बाउन्सरलाई स्वयंसेवक बनाएपछि चौतर्फी आलोचना भएको थियो ।
