शक्तिशाली आँधी ‘टाइफुन बाभी’ चीनको पूर्वी तटीय क्षेत्रमा पुगेपछि करिब २० लाख मानिसलाई सुरक्षित स्थानमा सारिएको छ । एक साताभित्र चीनमा पुगेको यो दोस्रो शक्तिशाली टाइफुन हो ।

करिब एक हजार किलोमिटर चौडाइ फैलिएको बाभी शनिबार साँझ ताइझोउ शहरमा प्रवेश गरेको थियो । त्यसपछि मध्यराततिर वेनझोउ शहरमा दोस्रोपटक पुगेको चिनियाँ अधिकारीहरूले जनाएका छन् ।

यसअघि जापानका दुर्गम टापुहरूमा क्षति पुर्‍याएको बाभी ताइवानको उत्तरी भाग नजिकबाट गुज्रँदा भारी वर्षा भएको थियो । आँधीका कारण फिलिपिन्समा पहिरो जाँदा कम्तीमा १७ जनाको मृत्यु भएको छ ।

बाभीको तीव्रता घटेर ‘गम्भीर उष्णकटिबन्धीय आँधी’मा रूपान्तरण भए पनि वर्षा गराउने यसको ठूलो प्रणालीका कारण अझै उच्च जोखिम कायम रहेको अधिकारीहरूले बताएका छन् । आँधी उत्तरपश्चिमतर्फ अघि बढ्दै क्रमशः कमजोर हुने अनुमान गरिएको छ ।

चीनको मौसम विभागका अनुसार आइतबार झेजियाङ प्रान्तको पूर्वी भाग र फुजियान प्रान्तको उत्तरपूर्वी क्षेत्रमा अत्यधिक वर्षा हुने सम्भावना छ । सम्भावित ठूलो क्षतिबाट जोगिन पूर्वसावधानीस्वरूप व्यापक रूपमा मानिसहरूको उद्धार तथा स्थानान्तरण गरिएको जनाइएको छ ।

राज्य सञ्चारमाध्यमका अनुसार झेजियाङ प्रान्तबाट मात्रै १७ लाखभन्दा बढी मानिसलाई सुरक्षित स्थानमा सारिएको छ भने छिमेकी प्रान्तहरूबाट पनि हजारौं मानिसलाई स्थानान्तरण गरिएको छ ।

झेजियाङमा विद्यालय, कार्यालय र बाहिरी गतिविधि स्थगित गरिएका छन् । करिब ४०० उडान र दर्जनौं रेल सेवा रद्द गरिएका छन् ।

करिब एक करोड जनसंख्या रहेको वेनझोउ शहर आँधीको सम्भावित मार्गमा परेकाले त्यहाँ पनि लाखौं बासिन्दालाई सुरक्षित स्थानमा सारिएको छ । बेइजिङमा समेत जोखिम न्यूनीकरणका लागि एक लाख मानिसलाई स्थानान्तरण गर्न आदेश दिइएको अधिकारीहरूले बताएका छन् ।

बाभी गत सोमबार गुआम र उत्तरी मारियाना टापुहरूमा प्रतिघण्टा २९० किलोमिटरको वेगमा चलेको ‘सुपर टाइफुन’का रूपमा विकसित भएको थियो । त्यसपछि कमजोर बन्दै जापानको रियुक्यु टापु शृङ्खलाको साकिशिमा क्षेत्रमा पुग्दा कम्तीमा पाँच जना घाइते भएका थिए भने हजारौं घरमा विद्युत् सेवा अवरुद्ध भएको थियो ।

ताइवानमा आँधीले प्रत्यक्ष असर नगरे पनि भारी वर्षापछि पहिरोको जोखिम बढेकाले हजारौं मानिस घर छाड्न बाध्य भएका छन् । ताइवान र जापानमा भने हालसम्म मानवीय क्षतिको विवरण आएको छैन ।

ताइवानी अधिकारीहरूले बाभीका कारण केही क्षेत्रमा एक मिटरसम्म वर्षा हुन सक्ने चेतावनी दिएका थिए । दर्जनौं उडान रद्द गरिएका छन् भने विद्यालय बन्द गरिएका छन् । खाद्यान्न र अत्यावश्यक सामग्री सञ्चय गर्न थालेपछि सुपरमार्केटका अधिकांश र्याक खाली भएका छन् ।

यसअघि यसै साता आएको ‘टाइफुन मेसाक’का कारण दक्षिणी चीनमा कम्तीमा ३९ जनाको मृत्यु भएको थियो । ठूलो संख्यामा पशुचौपाया मरेका थिए भने कृषि क्षेत्रमा व्यापक क्षति पुगेको थियो । मेसाककै प्रभावले हुबेई प्रान्तमा दुर्लभ मानिने दुईवटा टोर्नाडोसमेत आएको थियो ।