रुसले आइतबार राति गरेको ठूलो क्षेप्यास्त्र तथा ड्रोन आक्रमणमा किएभ र आसपासका क्षेत्रमा कम्तीमा १५ जनाको मृत्यु भएको छ । किएभमा मात्रै १२ जना र आसपासका क्षेत्रमा थप तीन जनाको ज्यान गएको युक्रेनी अधिकारीहरूले जनाएका छन् ।

युक्रेनी वायुसेनाले प्रतिरोधी (इन्टरसेप्टर) मिसाइलको अभावका कारण रुसले प्रहार गरेका २३ वटा ब्यालिस्टिक मिसाइलमध्ये एउटालाई पनि खसाल्न नसकिएको जनाएको छ । 

युक्रेनी राष्ट्रपति भोलोदिमिर जेलेन्स्कीले यसै साता हुने नेटो शिखर सम्मेलनमा सहयोगी राष्ट्रहरूले हवाई प्रतिरक्षा प्रणाली उपलब्ध गराउने विषयमा ठोस निर्णय लिनुपर्ने बताएका छन् ।

जेलेन्स्कीका अनुसार आइतबार रातिको आक्रमणमा रुसले ६८ वटा मिसाइल र ३५१ वटा आक्रमणकारी ड्रोन प्रहार गरेको थियो । युक्रेनी सेनाले अधिकांश क्रुज मिसाइल र ड्रोन निष्क्रिय पारे पनि ब्यालिस्टिक मिसाइल रोक्न नसकिएको उनले बताए । 

उनका अनुसार अमेरिकाले उपलब्ध गराएको प्याट्रियट प्रतिरोधी मिसाइल सहयोगी राष्ट्रहरूसँग मौज्दात रहेसम्म रुसले आवासीय भवनमाथि आक्रमण जारी राख्नेछ ।

आक्रमणपछि किएभका विभिन्न क्षेत्रमा ठूलो क्षति पुगेको छ । तीन वटा बहुमञ्जिला आवासीय भवन आंशिक रूपमा भत्किएका छन् भने केही भवनमा मिसाइल सिधै खसेका छन् । भग्नावशेषमा पुरिएकाहरूको उद्धार जारी रहेको छ । शहरका विभिन्न भवनमा आगलागी भएको किएभका मेयर भिताली क्लिच्कोले बताएका छन् । गोदाम र एक ग्यारेज कार्यशाला पनि क्षतिग्रस्त भएका छन् ।

युक्रेनका अनुसार किएभमा ४९ जना घाइते भएका छन् भने राजधानी बाहिरका क्षेत्रमा थप १६ जना घाइते भएका छन् । आगो निभाउन नदीबाट हेलिकप्टरमार्फत पानी ओसारेर प्रयोग गरिएको छ ।

युक्रेनी वायुसेनाले आक्रमणलाई लडाकू विमान, हवाई प्रतिरक्षा प्रणाली, विद्युतीय युद्ध प्रणाली, मानवरहित प्रणाली तथा मोबाइल फायर समूहको सहयोगमा प्रतिकार गरिएको जनाएको छ । प्रारम्भिक विवरणअनुसार ३७ वटा मिसाइल र ३२६ वटा ड्रोन खसालिएको वा निष्क्रिय पारिएको छ ।

यसअघि गत बिहीबार रुसले किएभमा गरेको ठूलो आक्रमणमा कम्तीमा ३० जनाको मृत्यु भएको थियो । त्यस घटनापछि जेलेन्स्कीले रुसले पुनः ठूलो आक्रमणको तयारी गरिरहेको चेतावनी दिएका थिए । 

युक्रेनले रुसमाथि सर्वसाधारणलाई लक्षित गरी आक्रमण गरेको आरोप लगाएको छ भने रुसले युक्रेनले आफ्नो ऊर्जा पूर्वाधारमा गरेको आक्रमणको प्रतिशोधस्वरूप सैन्य तथा ऊर्जा केन्द्रलाई निशाना बनाएको दाबी गरेको छ ।

युक्रेनले पनि रुसका ऊर्जा पूर्वाधारमाथि ड्रोन आक्रमणलाई निरन्तरता दिएको छ । रुसको नियन्त्रणमा रहेको क्रिमियाको सेवास्तोपोल शहरमा केही समय विद्युत् आपूर्ति अवरुद्ध भएको थियो । सेन्ट पिटर्सबर्ग नजिकका भिसोत्स्क र उस्त-लुगा तेल टर्मिनल पनि युक्रेनी आक्रमणको निशानामा परेका छन् ।

जेलेन्स्कीले मंगलबार टर्कीको अङ्कारामा शुरू हुने नेटो शिखर सम्मेलनमा अमेरिकी राष्ट्रपति डोनाल्ड ट्रम्पसँग भेटवार्ता गर्ने अपेक्षा गरिएको छ । उनले सम्मेलनमा अमेरिका र युरोपेली साझेदारहरूले युक्रेनको हवाई प्रतिरक्षा सुदृढ बनाउन निर्णायक निर्णय लिनुपर्ने बताएका छन् ।

युरोपेली आयोगकी अध्यक्ष उर्सुला भोन डेर लेयेनले पनि युक्रेनलाई थप हवाई प्रतिरक्षा प्रणाली उपलब्ध गराउने विषय नेटो शिखर सम्मेलनको प्रमुख एजेन्डामध्ये एक रहने बताएकी छन् ।