पूर्वमन्त्री एवं राप्रपा नेता रामकुमार सुब्बाविरुद्ध मोरङ जिल्ला अदालतमा मुद्दा दायर भएको छ । एक महिलाले सुम्बासहित तीन जनाविरुद्ध गैरकानूनी शरीर तलासी तथा बेइज्जती मुद्दा दायर गरेकी हुन् । 

सुब्बा राप्रपाका नेता हुन् । उनी २०७२ सालमा भूमि  मन्त्री बनेका थिए ।

सुब्बालगायत इटहरी उपमहानगरपालिका-९ बस्ने गोपाल साह र सुनिता घिमिरेविरुद्ध मुद्दा परेको हो । साह पीडित महिलाका ससुरा हुन् । 

श्रीमानसहित परिवारका सदस्यहरूले हेलाहोचो गरी घरबाट निकाला गरेको भन्दै पीडित महिलाले यसअघि अंश मुद्दा दायर गरेकी थिइन् । उनले आफूलाई श्रीमान र ससुराले बारम्बार यातना दिने गरेको बताएकी छन् ।

माइतीमा बस्दै आएकी ती महिलाले दायर गरेको मुद्दामा उनको परिवारले म्यादसमेत नबुझेको र गत चैत २२ गते पूर्वमन्त्री सुब्बा, सुनिता र ससुरा गोपालसमेत माइतीमै आएर दुर्व्यवहार गरेको उल्लेख छ । 

उनलाई पूर्वमन्त्री सुब्बाले आफू इटहरीको नेता र पूर्वमन्त्री रहेको भन्दै मुद्दा फिर्ता गर्न दबाब दिएको पीडितको जाहेरीमा उल्लेख छ । सुब्बाले आफूलाई ‘तिमी महिला नरहेको, महिलाको गुण नरहेको, महिलाको स्वरूप नरहेकोले घरजम नभएकोले हेर्न आएको’ भन्दै धाकधम्की दिएको उनको जाहेरीमा उल्लेख छ । उनले ती महिलालाई लैङ्गिक अपमान हुने शब्द प्रयोग गरेको फिरादपत्रमा उल्लेख छ । 

माइतीघरमा प्रतिवादी सुब्बासहितले आफ्नो लिङ्गप्रति प्रश्न गरेको र ‘तिमी हिँजडा भएको कारण अस्वीकार गरेको’ भन्दै अपमान गरेको पीडितको आरोप छ । 

‘प्रतिवादी रामकुमार सुब्बाले तिम्रो लिङ्ग हेर्नका लागि हामीले आफ्नै महिला (सुनिता घिमिरे) कर्मचारी ल्याएका छौं । तिमीले आफू केटी मानिस हो भन्ने कुराको पुष्टि गर्नुपर्छ भन्दै दबाब दिए’ जाहेरीमा पीडितले भनेकी छन्, ‘मैले इन्कार गरेँ ।  मेरो परिवारले पनि उक्त कुराको इन्कारी गर्नुभयो । तर, प्रतिवादी रामकुमार सुब्बाले आफू पूर्वमन्त्री रहेको तथा प्रहरी प्रशासन सबैमा प्रभाव रहेकोले सार्वजनिक रूपमा नाङ्गेझार पार्छौं भन्दै ममाथि र मेरो परिवारमाथि मानसिक र शारीरिक रूपमा दबाब सिर्जना गर्दै जान थाल्नुभयो ।’​

सुब्बासहितले आफ्नो अङ्गहरू हेर्न र महिला, पुरुष वा अन्य छुट्याउन भन्दै सँगै आएकी सुनितालाई आदेश दिएको पीडितले बताएकी छन् । उनीहरूको निर्देशनपछि घिमिरेले आफ्नो देब्रे पाखुरामा समातेर जबर्जस्ती घरको भान्साको छेउमा लगेर सबै कपडा खोली गोप्य अंगहरू हेरेको उनले बताएकी छन् । त्यसपछि ‘...हैन रहेछ’ भन्दै संकेत गरेको उनको भनाइ छ ।

पूर्वमन्त्री सुब्बाले भने साहको परिवार आफ्नै घरमा बस्ने गरेकाले मिलाउन गएको बताएका छन् ।

‘मेरै घरमा बसेर साहको परिवार व्यवसाय गर्छन्’, उनले भने, ‘ठूलै झगडा भएपछि मिलाउनका लागि म गएको हुँ । मैले केही पनि भनेको छैन । मेरो चरित्र हत्या गर्नका लागि यति भएको हो’, उनले भने ।

ती महिलाका श्रीमान भने विदेशमा रहेको सुब्बाले बताए ।