नेपाल राष्ट्र बैंकले बैंकिङ क्षेत्रलाई थप सुदृढ र प्रभावकारी बनाउन एक उच्चस्तरीय कार्यदल गठन गरेको छ ।

शुक्रबार एक विज्ञप्ति जारी गर्दै राष्ट्र बैंकले डा. रेवतबहादुर कार्कीको संयोजकत्वमा तीन सदस्यीय 'बैंकिङ क्षेत्र सुधार सुझाव कार्यदल' गठन गरिएको जानकारी दिएको हो । 

यो कार्यदलमा भुवनकुमार दाहाल सदस्य र नेपाल राष्ट्र बैंकको बैंक तथा वित्तीय संस्था नियमन विभागका कार्यकारी निर्देशक सदस्य-सचिवको रूपमा रहनेछन् । 

एक महिनाको कार्यकाल रहेको यो कार्यदलले बैंकिङ नीति, कर्जा प्रवाह, पुँजीबजार विकास र नेपाललाई ग्रे लिस्टबाट हटाउने जस्ता महत्त्वपूर्ण विषयमा सुझाव पेश गर्नेछ । 

राष्ट्र बैंकले यो कार्यदललाई बैंकिङ क्षेत्रको समग्र सुधार र सुदृढीकरणका लागि ठोस सुझावहरू तयार पार्ने जिम्मेवारी दिएको छ । 

कार्यदल विशेष रूपमा उदार तर विवेकशील (प्रुडेनसियल) बैंकिङ नीति नियमन, जोखिममा आधारित प्रभावकारी सुपरिवेक्षण र ग्राहकमैत्री बैंकिङ सेवाको विकासमा केन्द्रित रहने राष्ट्र बैंकले जनाएको छ । 

यस्तै, आर्थिक गतिविधिलाई पूर्णरूपमा चलायमान बनाउन बैंकिङ क्षेत्रको भूमिका, ग्रामीण क्षेत्रमा कर्जा प्रवाहलाई प्रभावकारी बनाउने उपाय र बैंक तथा वित्तीय संस्थाहरूको मर्जर तथा प्राप्तिपछिका समस्याको समाधानका लागि पनि कार्यदलले सुझाव दिनेछ ।