ब्राजिलका पूर्वराष्ट्रपति जाइर बोल्सोनारोमाथि देश छोडेर भाग्न सक्ने आशंकामा प्रहरीले उनको घर र राजनीतिक मुख्यालयमा छापा मारेको छ ।

शुक्रबार प्रहरीले बोल्सोनारोलाई खुट्टामा इलेक्ट्रोनिक जीपीएस ट्याग लगाउन आदेश दिएको छ भने उनलाई विदेशी कूटनीतिज्ञहरूसँग सम्पर्क गर्न, दूतावासमा जान र सामाजिक सञ्जाल प्रयोग गर्न पूर्ण रूपमा प्रतिबन्ध लगाइएको छ ।

बोल्सोनारोले सन् २०२२ को राष्ट्रपति निर्वाचनको परिणाम उल्टाउने षड्यन्त्र गरेको भन्दै ब्राजिलको सर्वोच्च अदालतले यी कडा प्रतिबन्धहरू लगाएको हो ।

उनी देश छोडेर भाग्न सक्ने सम्भावना रहेको भन्दै कडा निगरानी गर्न अदालतले आदेश दिएपछि प्रहरीले उनको घर र कार्यालयमा छापा मारेको हो ।

बोल्सोनारोमाथि निर्वाचन हारेपछि सत्ता कब्जा गर्न सैन्य 'कू' को योजना बनाएको गम्भीर आरोप लागेको छ । उनले यी आरोपहरूको खण्डन गर्दै आफूलाई निर्दोष बताएका छन् ।

छापा मार्ने क्रममा प्रहरीले बोल्सोनारोको घरबाट करिब १४ हजार अमेरिकी डलर नगद बरामद गरेको छ । बोल्सोनारोले यो रकम व्यक्तिगत प्रयोगका लागि भएको र यसको रसिद आफूसँग रहेको दाबी गरेका छन् ।

प्रहरीले उनलाई ब्रासिलियाको प्रहरी स्टेशनमा लगेर खुट्टामा इलेक्ट्रोनिक ट्याग लगाएको छ । बोल्सोनारोले यो कदमलाई 'अत्यन्त अपमानजनक' भन्दै आक्रोश व्यक्त गरेका छन् ।

'म ७० वर्षको पूर्वराष्ट्रपति हुँ, मैले देश छोड्ने कुरा कहिल्यै सोचिनँ,' उनले प्रहरी स्टेशनबाहिर पत्रकारहरूसँग भने ।

ब्राजिलको सर्वोच्च अदालतले बोल्सोनारो र उनका छोरा एडुआर्डोले अमेरिकासँग मिलेर ब्राजिलका अधिकारीहरूमाथि प्रतिबन्ध लगाउने षड्यन्त्र गरेको आरोप लगाएको छ ।

उनीमाथि कारवाही नगर्न अमेरिकी राष्ट्रपति डोनाल्ड ट्रम्पले सार्वजनिक रूपमै चेतावनी दिएको सीएनएनले लेखेको छ ।

वर्तमान राष्ट्रपति लुइज इनासियो लुला दा सिल्भा (लुला)ले ट्रम्पको धम्कीलाई 'प्रोटोकलविपरीत' भन्दै कडा आपत्ति जनाएका छन् ।

उनले भने, 'ब्राजिलको न्यायिक प्रणाली स्वतन्त्र छ, राष्ट्रपतिमा मेरो कुनै प्रभाव हुँदैन । बोल्सोनारोमाथि व्यक्तिगत नभई उनले सैन्य कूको प्रयास गरेको कार्यको आधारमा मुद्दा चलाइएको हो ।'

बोल्सोनारोसहित ३४ जनामाथि सैन्य कूको प्रयास, सशस्त्र आपराधिक संगठनमा संलग्नता, लोकतान्त्रिक शासनको उन्मूलन र हिंसात्मक कार्यमार्फत राज्य सम्पत्तिमा क्षति पुर्‍याएको लगायत पाँचवटा अभियोगमा मुद्दा चलाइएको छ ।

अभियोजकहरूले बोल्सोनारोको योजनामा लुला, उनको उपराष्ट्रपति र सर्वोच्च अदालतका एक मन्त्रीको हत्या गर्ने सम्भावित योजना समेत रहेको दाबी गरेका छन् । यदि दोषी ठहर भएमा बोल्सोनारोलाई ४३ वर्षसम्म जेल सजाय हुन सक्छ ।