अमेरिकी राष्ट्रपति ट्रम्पले भारतका प्रधानमन्त्री नरेन्द्र मोदीलाई शुल्कबारे कुरा गर्न चारपटक फोन गरे, तर मोदीले एकपटक पनि कुरा गरेनन् । यसले दुई नेताहरू बीचको तनाव बढाएको छ । यो दाबी जर्मन अखबार एफएजेडले गरेको छ । यद्यपि, अखबारले आफ्नो रिपोर्टमा यी फोनहरू कहिले गरिएको थियो भनेर उल्लेख गरेको छैन ।

अखबारले लेखेको छ कि मोदी भारतलाई त्यस्तो कुनै पनि 'स्टन्ट'को हिस्सा बनाउन चाहँदैनन्, त्यसैले उनले ट्रम्पसँग कुरा गर्न सिधै अस्वीकार गरेका हुन् ।

अखबारका अनुसार, मोदी ट्रम्पको आक्रामक व्यापार नीति र भारतलाई 'मृत अर्थतन्त्र' भनेकोमा रिसाएका छन् । पहिले दुई नेताहरूबीच राम्रो सम्बन्ध थियो, तर अहिले भारतले अमेरिकासँग व्यापार सम्झौताको लागि वार्ता रद्द गरेको छ। अमेरिकी प्रतिनिधिमण्डललाई नयाँ दिल्ली आउनबाट रोकिएको समाचारमा उल्लेख छ ।

ट्रम्पले भारतमा कुल ५० प्रतिशत कर लगाएका छन्, जसमध्ये २५ प्रतिशत कर जरिवानाको रूपमा लगाइएको छ, जुन अगस्ट २७, अर्थात् आजदेखि लागू भएको छ । ट्रम्प भन्छन् कि 'भारतले रूसी तेल खरिद गर्दा पुटिनलाई युक्रेन विरुद्ध युद्ध जारी राख्न मद्दत गरिरहेको छ।'

अखबारले विज्ञहरूलाई उद्धृत गर्दै भनेको छ- 'सामान्यतया ट्रम्पको तरिका भनेको व्यापार घाटाको बारेमा पहिले कुनै देशमाथि आक्रमण गर्नु हो, त्यसपछि उच्च करको धम्की दिनु हो। यसपछि, डरले वार्ता शुरू हुन्छ र अन्ततः उच्च कर लगाएर र त्यसपछि केही सहुलियत दिएर आफूलाई विजेता भन्न खोज्छ।'

धेरै देशहरूसँग यस्तो भएको छ र ट्रम्पले अमेरिकी बजारमा आफ्नो पकड कति बलियो छ भनेर देखाएका छन्, तर मोदीले यसपटक झुक्न अस्वीकार गरेको रिपोर्टमा उल्लेख छ । 

अखबारले लेखेको छ कि प्रधानमन्त्री मोदीलाई ट्रम्पको व्यवहारबाट धेरै नराम्रो लागेको छ । उनी मोदीलाई लगभग एक दशकअघि जिनपिङबाट प्राप्त भएको पुरानो अपमानको सम्झना गराइरहेका छन् । चिनियाँ राष्ट्रपति सी जिनपिङ गुजरात आएका थिए र मोदीलाई मित्रताको वाचा गरेका थिए, तर त्यही समयमा चिनियाँ सेना हिमालयमा भारतीय क्षेत्रमा प्रवेश गरेको थियो ।

यसपछि पनि मोदीले जिनपिङसँग राम्रो सम्बन्ध बनाउन खोजे तर भारतीय सैनिकहरू चिनियाँ सैनिकहरूसँग झडप हुँदा अवस्था झनै बिग्रियो । त्यो घटनापछि मोदीको मनमा गहिरो तितोपन आएको बताइएको छ ।

अब ट्रम्पको मनोवृत्ति पनि त्यस्तै भएको छ। फेब्रुअरीमा उनले मोदीलाई ह्वाइट हाउसमा बोलाएर प्रशंसा गरे र फोटो एल्बम उपहार दिए। दुई देशबीचको सम्बन्ध धेरै राम्रो चलिरहेको थियो।