पेरिस (रोयटर्स) - प्रधानमन्त्री फ्रान्कोइस बायरुले आफ्नो अलोकप्रिय ऋण कटौती योजनामा समर्थन जुटाउने प्रयास असफल भएपछि फ्रान्स फेरि अर्को संकटमा फसेको छ । उनको यो प्रयास असफल भएपछि देश राजनीतिक र आर्थिक अस्थिरतातर्फ धकेलिएको रोयटर्सले जनाएको छ । 

बायरुले आफ्नो ऋण कटौती योजनामा सेप्टेम्बर ८ मा विश्वासको मत लिने अप्रत्याशित घोषणा गरेपछि फ्रान्सेली बजारमा गिरावट आएको छ। उनको यो प्रस्तावलाई विपक्षी दलहरूले ठाडै अस्वीकार गर्दै उनको अल्पमतको सरकारलाई समयमै हटाउने अवसरको रूपमा लिएको समाचारमा उल्लेख छ । 

प्रधानमन्त्री बायरु मंगलबार आफ्नो घोषणापछि पहिलोपटक मञ्चमा आउँदा लड्न पुगेका थिए, जसले उनको कठिन अवस्थालाई प्रतीकात्मक रूपमा दर्शाउँछ। उनले सांसदहरूलाई अराजकता र जिम्मेवारीमध्ये एक रोज्न आग्रह गरे। उनले सेप्टेम्बर ८ अघि विवेकपूर्ण निर्णय लिन आफ्ना प्रतिनिधिहरूलाई दबाब दिन फ्रान्सेली जनतालाई अनुरोध गरेका छन् । 'म कसैलाई पनि आफ्नो मन परिवर्तन गर्न भनिरहेको छैन, तर यसमाथि पुनर्विचार गर्न सकिन्छ,' बायरुले पत्रकारहरूलाई भने।

यदि बायरुको सरकार ढलेमा म्याक्रोनले संसद् विघटन गरेर नयाँ निर्वाचनको घोषणा गर्न सक्नेछन् (जुन उनले पहिले अस्वीकार गरिसकेका छन्) वा नयाँ सरकार गठन गर्न सक्नेछन् । यद्यपि, दुवै विकल्पले फ्रान्सको बजेट समस्या वा राजनीतिक गतिरोधलाई समाधान गर्ने सम्भावना कम छ । 

रोयटर्सले एक प्रमुख मन्त्रालयका एक स्रोतलाई उद्धृत गर्दै म्याक्रोनले नयाँ प्रधानमन्त्री नियुक्त गर्ने अपेक्षा गरेको बताएको छ । 'फ्रान्सेली प्रधानमन्त्रीको विश्वासको मत लिने निर्णयले उनको स्थानमा अर्को प्रधानमन्त्री आउने सम्भावना बढी छ वा नयाँ संसदीय चुनाव हुने सम्भावना कम छ,' क्यापिटल इकोनोमिक्सका विश्लेषकहरूले लेखेका छन्, 'दुवै अवस्थामा, फ्रान्सको बजेट घाटा ऋण र अनुपात स्थिर गर्न आवश्यक स्तरभन्दा धेरै माथि रहनेछ।'

आन्तरिक मामिला मन्त्री ब्रुनो रिटेलियुले कन्जरभेटिभ रिपब्लिकनको नेतृत्व गर्छन् । उनले सरकारलाई गिराउनु गैरजिम्मेवारपूर्ण र फ्रान्सको हितविपरीत हुने बताए।

अन्य केही भने असहमत छन् । मरिन ले पेनको नेतृत्वमा रहेको अति-दक्षिणपन्थी नेसनल र्‍यालीले म्याक्रोनले तत्काल संसदीय चुनाव गराउन चाहेको बताएको छ ।

समाजवादीहरूको मत निर्णायक हुनेछ, उनीहरूले पनि बायरुको विपक्षमा मतदान गर्ने बताएका छन् । 'हामीलाई फरक प्रधानमन्त्री र सबैभन्दा महत्वपूर्ण, फरक नीति चाहिन्छ,' प्रमुख समाजवादी सांसद बोरिस भालाउले एक्समा लेखेका छन् ।

विश्वासको मतको मतदान विभिन्न समूहहरूद्वारा सामाजिक सञ्जालमा आह्वान गरिएको र वामपन्थी दलहरू र केही युनियनहरूले समर्थन गरेको विरोध प्रदर्शनको दुई दिनअघि हुँदैछ । यो प्रदर्शन सन् २०१८ मा इन्धनको मूल्यवृद्धि र जीवनयापनको लागतलाई लिएर भएको येलो भेस्ट आन्दोलनको झल्को दिने खालको रहेको समाचारमा उल्लेख छ । 'जबसम्म फ्रान्कोइस बायरु आफ्नो पदमा पुष्टि हुँदैनन्, जुन आज असम्भव देखिएको छ । हामी एउटा नयाँ चरणमा प्रवेश गर्नेछौं, जुन अस्थिरताको चरण हुनेछ,' जनमत सर्वेक्षणकर्ता जिन-डानिएल लेभीले भने ।' उनले अर्थतन्त्र र अन्तर्राष्ट्रिय जगतमा फ्रान्सको छविको लागि नकारात्मक परिणामको भविष्यवाणी गरेका छन् ।

बायरुसँग नजिकको एक स्रोतले उनको सरकार बजेट प्रस्तावका विवरणहरूमा वार्ताका लागि खुला रहेको बतायो, यद्यपि उनले बजेटमा कडाइ आवश्यक रहेकोमा जोड दिएका छन् । बायरुले उच्च आम्दानी भएका करदाताहरूलाई घाटा नियन्त्रण गर्न विशेष प्रयास गर्न आग्रह गर्ने बताएका छन् ।