११ साउन २०८३, सोमबार
जेनजी समूहले अख्तियार दुरुपयोग अनुसन्धान आयोगका प्रमुख आयुक्त प्रेम कुमार राईसहित सबै आयुक्तको राजीनामा मागेको छ ।
जेनजी मुभमेन्ट अलाइन्सले सोमबार प्रमुख आयुक्त राईलाई राजीनामाका लागि दबाब पत्र इमेलमार्फत् पठाएको हो ।
भदौ २३ गते भएको जनेजी आन्दोलनका मुख्य माग भ्रष्ट्राचार र दण्डहिनताको अन्त्य रहेको उल्लेख गर्दै यी माग पूरा गर्न आयोगमा निष्पक्ष, स्वतन्त्र र सक्षम पदाधिकारीको नियुक्ति गर्न आवश्यक रहेको पत्रमा भनिएको छ ।
तर, प्रमुख आयुक्त राई लगायत सबै आयुक्तको नियुक्ति संसदीय सुनुवाइबिना नै पूर्वप्रधानमन्त्री केपी शर्मा ओलीको सरकारले अध्यादेशमार्फत् गरेकाले यसले निष्पक्षतामा ठूलो प्रश्न उठाउने अलाइन्सले भनेको छ ।
राई स्वयंको नाम वाइडबडी घोटाला लगायतका प्रकरणमा मुछिएको अलाइन्सको भनाइ छ । ‘विशेष अदालतले समेत स्पष्ट रूपमा तपाई र सिंगो अख्तियार दुरुपयोग अनुसन्धान आयोगकै कार्यप्रणालीमाथि प्रश्न उठाएको छ । यसले भ्रष्ट्राचार अन्त्य र दोषीलाई कारबाही लगायतका सबै पक्षमा नकारात्मक प्रभाव पार्दछ भन्ने अनुमान गर्न गलत नहोला । तपाईंको नेतृत्वमा यी कार्य निष्पक्ष रूपले हुनसक्ला भन्नेमा कुनै विश्वसनीय आधार छैन’, पत्रमा भनिएको छ ।
