११ साउन २०८३, सोमबार
आयोजक राष्ट्र मलेसिया विरुद्धको चौथो टी–२० अन्तर्राष्ट्रिय क्रिकेटमा नेपाली राष्ट्रिय महिला टोलीले जितका लागि एक सय १२ रनको लक्ष्य पाएको छ ।
टस जितेर पहिले ब्याटिङको निर्णय लिएको घरेलु टोली मलेसियाले निर्धारित ओभरमा पाँच विकेट गुमाएर एक सय ११ रनको योगफल तयार पारेको हो ।
माथिल्लो क्रममा तीनवटै ब्याटरलाई सस्तैमा गुमाएको मलेसियाका लागि चौथो नम्बरमा क्रिज समाल्न आएकी मस एलिसाले उत्कृष्ट अर्धशतकीय पाली खेलिन् ।
एलिसाले अविजित ५६ रन बनाइन् । यस क्रममा उनले ६३ बलको सामना गरी पाँच चौका पनि हिर्काइन् । माहिरा इजाती इस्माइलले टोलीको खातामा १८ रन थपिन् ।
नुर दानिया सुहादाले पनि १५ रन बटुलिन् । मलेसियाका दुवै ओपनर खाता खोल्नुअघि नै पेभेलियन फर्किएका थिए । मलेसियाले अतिरिक्त रूपमा पनि १७ रन पायो ।
नेपाली टोलीका बलर कविता कुँवरले तीन विकेट हात पारिन् । उनले चार ओभरमा केवल १० रन खर्चिएकी थिइन् । पूजा महतो र कविता जोशीले पनि एक–एक विकेट हात पारे ।
पाँच खेलको शृंखलामा मलेसिया २–१ ले अगाडि छ । पहिलो खेलमा मलेसिया तीन रनले विजयी भएको थियो । दोस्रो खेलमा नेपाल ६ विकेटले विजयी भएको थियो ।
शृंखलाको तेस्रो खेलमा मलेसियाले नेपाललाई १३ रनले पराजित गरेको थियो । शृंखलाको पाँचौँ तथा अन्तिम खेल बुधबार खेलिने छ ।
