०७ साउन २०८३, बिहीबार
खेलको प्रारम्भमै भएको आत्मघाती गोलका कारण नेपाली टोली एएफसी एसियन कपको तेस्रो चरणको छनोट अन्तर्गत मंगलबार खेलिएको खेलमा भियतनामसँग पराजित भएको छ ।
नेपाली टोली आयोजक राष्ट्र भियतनामसँग ०-१ गोलले पराजित भएको हो । नेपाली टोलीको एएफसी एसियन कपमा छनोट हुने सम्भावना पनि समाप्त भइसकेको छ ।
खेलको प्रारम्भमै नेपाली टोलीबाट आत्मघाती गोल भएको थियो । खेल शुरू भएको पाँचौं मिनेटमै नेपाली टोलीका खेलाडी सुमन श्रेष्ठबाट आत्मघाती गोल भएको थियो । त्यसपछि दुवै टोलीबाट थप गोल हुन सकेन ।
नेपाली टोलीले भियतनामको घरेलु मैदानमा आफ्नो ‘होम गेम’ खेलेको हो । सन् २०२७ मा आयोजना हुने एएफसी एसियन कपको तेस्रो चरणको छनोटअन्तर्गत यो खेल खेलिएको हो ।
यसअघि, असोज २३ गते नेपाली टोलीले भियतनामकै हो ची मिन्ह सिटीस्थित घरेलु मैदानमा ‘अवे खेल’ खेलेको थियो । उक्त खेलमा पनि भियतनामले नेपाललाई ३–१ गोलले हराएको थियो ।
मंगलबारको खेल नेपालले घरेलु मैदानमा खेल्नुपर्ने थियो । तर, नेपालको एक मात्र अन्तर्राष्ट्रिय फुटबल स्टेडियम ‘दशरथ रंगशाला’ एसियाली फुटबल महासंघ (एएफसी)को निलम्बनमा परेकाले नेपालले दोस्रो लेग खेल पनि भियतनामको घरेलु मैदानमा खेल्नु परेको हो ।
एसियन कपको जारी छनोट प्रतियोगितामा नेपालले हालसम्म एक खेल पनि जित्न सकेको छैन । प्रतियोगितामा नेपाली टोलीले भोगेको यो चौथो हार हो ।
नेपाल समूह ‘एफ’ तालिकाको सबैभन्दा तल (चौथो स्थानमा) छ । नेपाली टोली गत चैत १२ गते खेलिएको आफ्नो पहिलो खेलमा मलेसियासँग ०-२ गोलले पराजित भएको थियो ।
यसैगरी, गत जेठ २७ गते खेलिएको आफ्नो दोस्रो खेलमा पनि नेपाली टोली तुलनात्मक रूपमा कमजोर प्रतिद्वन्द्वी लाओससँग १-२ गोलले पराजित भएको थियो ।
यसैगरी, असोज २३ गते खेलिएको तेस्रो खेलमा नेपाली टोली भियतनामसँग १–३ गोलले पराजित भएको थियो ।
अब नेपाली टोलीले मलेसिया र लाओससँग एक–एक खेल खेल्नु पर्नेछ । नेपाल र मलेसियाबीचको खेल आगामी मंसिर २ गते तथा नेपाल र लाओसबीचको खेल आगामी चैत १७ गते खेलिने छ ।
