०९ साउन २०८३, शनिबार
युरोपेली क्षेत्रबाट छनोट चरण पार गर्दै इङ्ल्यान्ड आगामी फिफा पुरुष विश्वकप फुटबल प्रतियोगितामा स्थान सुरक्षित गर्ने पहिलो राष्ट्र बनेको छ । इङ्ल्यान्डको टोली युरोपेली क्षेत्रको समूह ‘के’ बाट विश्वकपमा छनोट भएको हो ।
इङ्ल्यान्डले आफ्नो पछिल्लो खेलमा तुलनात्मक रुपमा कमजोर प्रतिद्वन्द्वी लात्भियामाथि ५–० गोलको सजिलो जित हासिल गर्यो । उक्त खेलमा इङ्ल्यान्डको जितमा ह्यारी केनले दुई गोलको योगदान गरे । एन्थोनी गोर्डन र अब्रेची एजेले पनि एक–एक गोल गरे ।
अर्को एक गोल भने लात्भियाका खेलाडीबाट आत्मघाती रूपमा भएको थियो । समूह ‘के’ को छनोटमा हालसम्म ६ खेल खेलेको इङ्ल्यान्डले १८ अंक बटुलिसकेको छ । इङ्ल्यान्डले सबै खेलमा जीत हात पारेको छ ।
इङ्ल्यान्डले विपक्षीको पोष्टमा १८ गोल गसिकेको छ भने आफूले एक गोल पनि खाएको छैन । तालिकाको दोस्रो स्थानमा आसिन अल्बानियाले ६ खेलबाट ११ अंकमात्र बटुल्न सकेको छ । छनोट प्रतियोगिताको प्रत्येक समूहबाट एक–एक टोली सिधै विश्वकपमा छनोट हुने प्रावधान छ ।
इङ्ल्यान्ड विश्वकपको पूर्वविजेता पनि हो । इङ्ल्यान्डले सन् १९६६ मा विश्वकपको उपाधि उचालेको थियो । त्यसयता भने इङ्ल्यान्डले विश्वकपको उपाधि जित्न सकेको छैन ।
विश्वकप फुटबलको २३औँ संस्करण सन् २०२६ को जुन ११ देखि जुलाई १९ तारिखसम्म आयोजना हुँदैछ । आगामी विश्वकप अमेरिका, मेक्सिको र क्यानडामा संयुक्त रुपमा आयोजना हुँदैछ ।
