०९ साउन २०८३, शनिबार
थाइल्यान्डमा जारी एएफसी महिला यू–१७ एसियन कप छनोटमा फूटबल प्रतियोगिताको आफ्नो दोस्रो खेलमा शुक्रबार नेपालले आयोजक राष्ट्रको सामना गर्दैछ ।
नेपाल र थाइल्यान्डबीचको खेल चोनबुरी रंगशालामा नेपाली समयअनुसार साँझ ५:१५ बजे शुरू हुनेछ । नेपाल र थाइल्यान्ड प्रतियोगिताको समूह ‘एफ’ मा छन् ।
उक्त समूहमा तेस्रो टोलीको रुपमा तुर्कमिनिस्तान रहेको छ । नेपाली टोली आफ्नो पहिलो खेलमा तुर्कमिनिस्तानसँग गोलरहित बराबरीमा रोकिएको थियो ।
थाइल्यान्डले भने आफ्नो पहिलो खेलमा तुर्कमिनिस्तानलाई १७–० गोलको विशाल अन्तरले पराजित गरेको थियो । त्यसैले थाइल्यान्ड आगामी यू–१७ एसियन कपमा छनोट हुने बलियो सम्भावना छ ।
एएफसी महिला यू–१७ एसियन कप सन् २०२६ को अप्रिल ३० देखि मे १७ तारिखसम्म चीनमा आयोजना हुँदैछ । उक्त प्रतियोगितामा सहभागी हुने आठ टोलीको टुङ्गो छनोट प्रतियोगिताबाट लाग्नेछ ।
यू–१७ एसियन कपमा सहभागी हुने चार टोलीको टुङ्गो भने यसअघि नै लागिसकेको छ । चीनले आयोजकका रुपमा उक्त प्रतियोगितामा सहभागिता जनाउने छ ।
उत्तर कोरिया अघिल्लो संस्करण (सन् २०२४) को विजेताका रुपमा सहभागी हुनेछ । अघिल्लो संस्करणमा दोस्रो भएको जापान र तेस्रो भएको दक्षिण कोरियाले पनि स्वतः आगामी संस्करणमा सहभागिता जनाउन पाउने छन् ।
