बंगलादेशको ढाकास्थित हजरत शाहजलाल अन्तर्राष्ट्रिय विमानस्थलको कार्गो क्षेत्रमा शनिबार दिउँसो ठूलो आगलागी भएको छ। आगलागीपछि विमानस्थलका सबै उडान स्थगित गरिएको छ।

बिमान बंगलादेश एयरलाइन्स र नागरिक उड्डयन प्राधिकरणका प्रवक्ता काउसर महमुदका अनुसार आगलागी करिब दिउँसो २:१५ बजे रिपोर्ट गरिएको थियो।

उनका अनुसार विमानस्थल, बंगलादेश सेना, वायुसेना र अन्य निकायका दमकल टोलीले तत्कालै संयुक्त रूपमा आगो नियन्त्रणमा लिन प्रयास सुरु गरेका छन्। महमुदले सर्वसाधारणलाई शान्त रहन र संयम अपनाउन आग्रह गर्दै विस्तृत जानकारी आगो नियन्त्रणमा आएपछि सार्वजनिक गरिने बताए।

फायर सर्भिसका अधिकारी तल्हा बिन जसिमका अनुसार आगो लागेको सूचना करिब २:३० बजे प्राप्त भएको थियो। “हाल ३७ वटा दमकलका इकाइ आगो नियन्त्रणमा खटिएका छन्,” उनले भने।

फायर सर्भिसका महानिर्देशक ब्रिगेडियर जनरल मुहम्मद जाहिद कमालले घटनास्थलको प्रत्यक्ष अनुगमन गरिरहेको जनाइएको छ।

विमानस्थलका कार्यकारी निर्देशक एस.एम. रागिब सामादका अनुसार वायुसेनाको दमकलसहित सबै सुरक्षाकर्मी र निकायले संयुक्त रूपमा काम गरिरहेका छन्।

हाल १३ वटा फायर स्टेशनका ३७ इकाइले आगो निभाउने प्रयास गरिरहेका छन् भने बंगलादेश नौसेना र सीमा सुरक्षा बलका दुई पल्टन पनि उद्धारमा खटिएका छन्।

सावधानीका लागि विमानस्थलमा सबै उडान स्थगित गरिएको छ। आगो फैलिन नदिन ह्याङ्गरमा रहेका विमानहरूलाई सुरक्षित स्थानमा सारिएको छ।

आगोका कारण ढाकाबाट अन्य गन्तव्यका र ढाकातर्फ आउने धेरै उडानहरू अन्यत्र मोडिएका छन्।
ढाकाबाट क्वालालम्पुर जाने बाटिक एयरको उडान र मुम्बई जाने इन्डिगो एयरको उडान हाल ट्याक्सीवेमा पर्खिरहेका छन्।