२२ असार २०८३, सोमबार
जेनजी आन्दोलनका क्रममा प्रहरीसँग लुटेको पेस्तोलबाट हवाई फायर गरी सर्वसाधारणलाई आतंकित पारेको आरोपमा प्रहरीले दुई जनालाई पक्राउ गरेको छ ।
पक्राउ पर्नेमा नुवाकोटको लिखु गाउँपालिका–६ घर भएर काठमाडौं नयाँबजार बस्ने २३ वर्षीय समीर श्रेष्ठ र काभ्रेको पनौती नगरपालिका–१० घर भएर काठमाडौंको क्षेत्रपाटी बस्ने २३ वर्षीय एलेक्स नेपाली छन् ।
उनीहरूले काठमाडौंको इचंगुनारायण मन्दिर क्षेत्रमा पेस्तोल देखाई सर्वसाधारणलाई आतंक सिर्जना गरेको आरोप छ ।
काठमाडौं उपत्यका अपराध अनुसन्धान कार्यालयका प्रवक्ता एवं प्रहरी उपरीक्षक (एसपी) काजी कुमार आचार्यका अनुसार दुवै जनालाई ढल्कुबाट नियन्त्रणमा लिइएको हो ।
प्रहरीका अनुसार यी दुईजनाबाट प्रहरीले बोक्ने चाइनिज पेस्तोल एक थान, पेस्तोलमा लाग्ने म्याग्जिन एक थान र ३११–२३ लेखिएको १२ राउण्ड गोली बरामद गरिएको छ ।
एसपी आचार्यका अनुसार बरामद हतियार र पक्राउ परेका दुवै जनालाई थप कारबाहीका लागि जिल्ला प्रहरी परिसर भद्रकाली पठाइएको छ ।
