२० असार २०८३, शनिबार
राष्ट्रिय स्वतन्त्र पार्टीका (रास्वपा)का सभापति रवि लामिछानेलाई बयानका लागि नख्खु कारागारबाट सिंहदरबार ल्याइएको छ ।
भदौ २३ र २४ गतेको जेनजी आन्दोलनका क्रममा भएका घटनाका सम्बन्धमा जाँचबुझका लागि गठित आयोगले रविलाई बयानका लागि सिंहदरबारस्थित आयोगको कार्यालयमा झिकाएको हो ।
जेनजी आन्दोलनको क्रममा लामिछाने नख्खु कारागारबाट बाहिर निस्किएको घटनाबारे बयान दिन लामिछानेलाई बोलाइएको आयोगका एक सदस्यले जानकारी दिए ।
अहिले उनको बयान भइरहेको छ ।
सहकारी संस्थाको रकम हिनामिना प्रकरणमा मुछिएका लामिछाने पुर्पक्षका लागि कारागार रहेका बेला २४ भदौमा असुरक्षाको कारण देखाउँदै अन्य कैदीबन्दीसँगै बाहिर निस्किएका थिए ।
रवि बाहिर निस्किँदा कारागार प्रशासनले दिएको भनिएको पत्रको आधिकारिकतामा समेत प्रश्न उठेको थियो । त्यसपछि रवि पुन: कारागारमै फर्किएका थिए ।
रवि निस्किएपछि नख्खुसहित देशभरका धेरै कारागारबाट कैदीबन्दी भागेका थिए ।
केही कैदी फर्किए पनि करिब पाँच हजार कारागार बाहिरै छन् ।
