११ साउन २०८३, सोमबार
चारपटकको च्याम्पियन जर्मनी आगामी फिफा विश्वकप फुटबलमा छनोट भएको छ । जर्मनी मंगलबार बिहान सम्पन्न खेलमा स्लोभाकियालाई ६–० गोलको फराकिलो अन्तरले हराउँदै विश्वकपमा छनोट भएको हो ।
जर्मनी युरोपेली क्षेत्रको छनोट प्रतियोगिताको समूह ‘ए’ बाट विश्वकपमा छनोट भएको हो । जर्मनीको टोलीले छनोट प्रतियोगितामा आफूले खेलेको ६ मध्ये पाँच खेलमा जीत र एक खेलमा हारको नतिजाबाट १५ अंक बटुल्यो ।
स्लोभाकिया भने ६ खेलबाट १२ अंक बटुल्दै तालिकाको दोस्रो स्थानमा रह्यो । स्लोभाकियाले अब विश्वकपमा स्थान बनाउन अन्तरमहादेशीय प्ले–अफ खेल्नु पर्नेछ । छनोट चरणको अन्तिम खेलमा जर्मनीलाई हराएको भए स्लोभाकिया विश्वकपमा पुग्ने थियो ।
घरेलु मैदानमा खेलिएको स्लोभाकिया विरुद्धको खेलमा जर्मनीका लागि लेरोय सानेले दुई गोलको योगदान गरे । उनले निर्धारित समयको ३६औँ र ४१औँ मिनेटमा गोल गरेका थिए । त्यसअघि, १८औँ मिनेटमा निक वोल्टेमेडले पहिलो गोल गरेका थिए ।
यसैगरी, जर्सी ग्नाब्रीले २९औँ, रिड्ली बाकुले ६७औँ र असान ओएड्राओगोले ७९औँ मिनेटमा एक–एक गोल थपेका थिए । युरोपेली क्षेत्रबाट यसअघि क्रोएसिया, इङ्ल्यान्ड, फ्रान्स, नर्वे र पोर्चुगल विश्वकपमा छनोट भइसकेका छन् ।
जर्मनी चारपटकको विश्वकप विजेता हो । जर्मनीले सन् १९५४, सन् १९७४, सन् १९९० र सन् २०१४ मा विश्वकपको उपाधि चुमेको थियो । यसका अतिरिक्त जर्मनी चारपटक विश्वकपको उप–विजेता बनेको थियो ।
