०४ साउन २०८३, सोमबार
दोस्रो एकदिवसीय अन्तर्राष्ट्रिय क्रिकेटमा पनि घरेलु टोली न्युजिल्यान्डले वेस्ट इन्डिजलाई पाँच विकेटले हराएको छ ।
जितसँगै न्युजिल्यान्डले अन्तिम भिडन्तअघि नै तीन खेलको शृंखलामाथि पनि कब्जा जमाएको छ । पहिलो खेलमा न्युजिल्यान्डले वेस्ट इन्डिजलाई सात रनले हराएको थियो ।
दोस्रो खेलमा टस हारी पहिले ब्याटिङको निम्तो पाएको वेस्ट इन्डिजले निर्धारित ३४ ओभरमा नौ विकेट गुमाएर दुई सय ४७ रन बनाएको थियो ।
जवाफी ब्याटिङमा ओर्लिएको न्युजिल्यान्डले ३३.३ ओभरमा पाँच विकेट गुमाएर विजय लक्ष्य पूरा गर्यो । प्रतिकूल मौसमका कारण खेल ३४ ओभरमा झारिएको थियो ।
न्युजिल्यान्डको जितमा ओपनर ब्याट्सम्यान डेभोन कनवेले ९० रनको योगदान गरे । अर्का ओपनर रचिन रविन्द्रले पनि ५६ रन बनाए ।
विकेटकिपर ब्याट्सम्यान टम लाथम ३९ रनमा अविजित रहे । घरेलु टोलीको जितमा कप्तान मिचेल सान्टनर पनि अविजित ३४ रनको योगदान गरे ।
त्यसअघि, भ्रमणकारी टोली वेस्ट इन्डिजका लागि कप्तान साई होपले उत्कृष्ट शतकीय पारी खेलेका थिए । उनले अविजित एक सय नौ रन बनाए । उनले ६९ बलमा चार छक्का र १३ चौका हिर्काए ।
क्यारेबियन टोलीका कप्तान साई होपले एकदिवसीय अन्तर्राष्ट्रिय क्रिकेटमा महान खेलाडी ब्रायन लाराको एउटा कीर्तिमान पनि तोडे ।
उनी एकदिवसीय अन्तर्राष्ट्रिय क्रिकेटमा कप्तानको भूमिकामा वेस्ट इन्डिजका लागि सबैभन्दा बढी शतक प्रहार गर्ने खेलाडी बने ।
एकदिवसीय क्रिकेटमा कप्तानको भूमिकामा साई होपले प्रहार गरेको यो छैटौं शतक हो । लाराले भने कप्तानको भूमिकामा वेस्ट इन्डिजका लागि पाँचवटा शतक प्रहार गरेका थिए ।
३२ वर्षीय साई होपले एकदिवसीय अन्तर्राष्ट्रिय क्रिकेटमा ६ हजार रनको कोशेढुङ्गा पनि पार गरे । उनले एक सय ४२ पाली खेल्दै ६ हजार रन पूरा गरेका हुन् ।
साई होपले एकदिवसीय अन्तर्राष्ट्रिय क्रिकेटमा प्रहार गरेको यो १९औं शतक हो । होपको नाममा अर्को एउटा कीर्तिमान पनि छ । शृंखलाको तेस्रो खेल शनिबार ह्यामिल्टनमा खेलिने छ ।
