०५ साउन २०८३, मंगलबार
प्रभावशाली खेलाडी केलियन एमबाप्पे एक्लैले चार गोल गरेपछि स्पेनिस ‘पावर हाउस’ रियल म्याड्रिडले च्याम्पियन्स लिग फुटबलको आफ्नो पछिल्लो खेलमा ग्रिसको ओलम्पियाकसमाथि रोमाञ्चक जीत हासिल गरेको छ । रियल म्याड्रिडले बिहीबार बिहान सम्पन्न खेलमा ओलम्पियाकसलाई ४–३ गोलले हराएको हो ।
घरेलु मैदानमा खेलिएको खेलको आठौँ मिनेटमै ओलम्पियाकसले अग्रता लिएको थियो । घरेलु टोलीका लागि फ्रान्सिस्को चिक्विन्होले गोल गरेका थिए ।
त्यसपछि आठ मिनेटको बीचमा फ्रान्सेली स्टार एमबाप्पेले लगातार तीन गोल गरे । उनले निर्धारित समयको २२औँ, २४औँ र २९औँ मिनेटमा गोल गरेका थिए । एमबाप्पेको गोलपछि पहिलो हाफमै रियल म्याड्रिडले ३–१ को अग्रता लियो ।
निर्धारित समयको ५२औँ मिनेटमा मेहदी तारेमीले ओलम्पियाकसका लागि दोस्रो गोल गरे । ६०औँ मिनेटमा एमबाप्पेले रियलका लागि चौथो गोल थपे । निर्धारित समयको खेल सकिनुभन्दा नौ मिनेटअघि ओलम्पियाकसका लागि अयुब एल काबीले तेस्रो गोल गरेका थिए ।
एमबाप्पेले च्याम्पियन्स लिग फुटबलको इतिहासमा दोस्रो छिटो ह्याट्रिकको कीर्तिमान पनि बनाएका छन् । पाँचौँ चरणको खेल सकिँदासम्म चार जित र एक हारबाट १२ अंक जोडेको रियल म्याड्रिड तालिकाको पाँचौँ स्थानमा छ । ओलम्पियाकस भने दुई अंकसहित ३३औँ स्थानमा छ।
