१२ साउन २०८३, मंगलबार
भारतीय विदेशमन्त्री एस जयशंकरले इटाली भारतको सबैभन्दा नजिकका साझेदारमध्ये एक भएको बताएका छन्।
बुधबार नयाँ दिल्लीमा इटालीका उपप्रधान तथा विदेशमन्त्री एन्टोनियो ताजानीसँग भएको द्विपक्षीय वार्ताका क्रममा उनले आतंकवादको वित्तपोषणविरुद्ध दुवै देशबीचको सहकार्य थप सुदृढ बनाउने प्रतिबद्धता दोहोर्याए।
वार्ताको प्रारम्भिक मन्तव्यमा जयशंकरले गत महिना नयाँ दिल्लीमा भएको आतंकवादी घटनापछि इटाली सरकारले व्यक्त गरेको ऐक्यबद्धताप्रति धन्यवाद ज्ञापन गरे। उनले सुरक्षा सहकार्यका क्षेत्रमा भारत–इटाली सम्बन्धले हासिल गरेको प्रगतिलाई पनि स्मरण गरे।
'गत महिना नयाँ दिल्लीमा आतंकवादी घटना हुँदा इटाली सरकारबाट प्राप्त ऐक्यबद्धताको सन्देशका लागि म तपाईंलाई धन्यवाद दिन चाहन्छु,' जयशंकरले भने।
उनका अनुसार आतंकवादको वित्तपोषण रोक्ने विषयमा भारत र इटाली वित्तीय कार्य समूह (एफएटीएफ)मार्फत नजिकबाट सहकार्य गरिरहेका छन्।
'हालै जोहान्सबर्गमा सम्पन्न जी–२० शिखर सम्मेलनका क्रममा हाम्रा प्रधानमन्त्रीहरूबीच भएको भेटमा आतंकवादको वित्तपोषणविरुद्ध संयुक्त पहल अघि बढाउने सहमति भएको थियो। एफएटीएफसहितका अन्तर्राष्ट्रिय मञ्चमा हामी इटालीलाई सबैभन्दा नजिकका साझेदारमध्ये एकका रूपमा लिन्छौं,' उनले बताए।
जयशंकरले भारत–इटाली सम्बन्ध निरन्तर गतिशील बन्दै गएको उल्लेख गर्दै ताजानीको बारम्बारको भारत भ्रमणले दुई देशबीचको गहिरो प्रतिबद्धता झल्काउने बताए। 'तपाईंको नियमित भ्रमणले सरकारी तहमा मात्र होइन, व्यक्तिगत सम्बन्धमा पनि नजिकपन देखाउँछ,' उनले भने।
साझेदारी लोकतान्त्रिक मूल्य, सभ्यता, संस्कृति तथा सुरक्षित र समृद्ध विश्वप्रतिको साझा दृष्टिकोणमा आधारित रहेको उनले स्पष्ट पारे।
भेटका क्रममा ताजानीको नेतृत्वमा आएको व्यावसायिक प्रतिनिधिमण्डल र मुम्बईमा भारतीय उद्योगीहरूसँग हुने भेटघाटबारे पनि छलफल भएको थियो।
जयशंकरले सन् २०२५–२९ का लागि तय गरिएको संयुक्त रणनीतिक कार्ययोजनामा आर्थिक सहकार्य महत्वपूर्ण अंश रहेको र यसलाई अघि बढाउन इटालीले सक्रिय भूमिका खेलेको बताए।
दुवै पक्षबीच राजनीतिक सहकार्य, रक्षा, समुद्री सुरक्षा, अन्तरिक्ष, संस्कृति, महत्वपूर्ण प्रविधि र जनस्तरको सम्बन्ध विस्तारका विषयमा विचारविमर्श भएको छ। साथै, इन्डो–प्यासिफिक क्षेत्र, पश्चिम एसिया, युक्रेन संकट तथा त्यससँग सम्बन्धित कूटनीतिक प्रयासबारे पनि छलफल भएको जनाइएको छ। संयुक्त राष्ट्रसंघलगायत बहुपक्षीय मञ्चमा भारत–इटाली सहकार्य नजिक रहेको जयशंकरले उल्लेख गरे।
इटालीका उपप्रधान तथा विदेशमन्त्री ताजानी यस वर्ष दोस्रोपटक भारत भ्रमणमा आएका हुन्, जसले दुवै देशबीचको कूटनीतिक संलग्नता अझ गहिरिँदै गएको संकेत गर्दछ।
यसैबीच, भारतीय विदेश मन्त्रालयका प्रवक्ता रणधीर जैसवालले सामाजिक सञ्जाल ‘एक्स’मार्फत ताजानीको स्वागत गर्दै दिल्ली र मुम्बईमा तय कार्यक्रमहरूले भारत–इटाली रणनीतिक साझेदारीलाई थप सुदृढ बनाउने विश्वास व्यक्त गरेका छन्।
यो भ्रमण उच्चस्तरीय आदानप्रदानको निरन्तरताका रूपमा आएको हो। यसअघि नोभेम्बर २३ मा जी–२० शिखर सम्मेलनका क्रममा प्रधानमन्त्री नरेन्द्र मोदी र इटालीकी प्रधानमन्त्री जर्जिया मेलोनीबीच भेट भएको थियो, जहाँ व्यापार, लगानी, रक्षा, नवप्रवर्तन, कृत्रिम बुद्धिमत्ता, अन्तरिक्ष र शिक्षा क्षेत्रमा सहकार्यको समीक्षा गरिएको थियो।
