०२ साउन २०८३, शनिबार
अमेरिकी राष्ट्रपति डोनाल्ड ट्रम्पको समर्थन पाएका नास्री अस्फुरा होन्डुरसको अत्यन्तै कडा प्रतिस्पर्धात्मक राष्ट्रपतीय निर्वाचनमा विजयी घोषित भएका छन् ।
प्राविधिक समस्या र धाँधलीको आरोपका कारण हप्तौं ढिलाइ भएपछि राष्ट्रिय निर्वाचन परिषद् (सीएनई)ले नतिजा सार्वजनिक गरेको हो ।
सीएनईका अनुसार कन्जरभेटिभ नेशनल पार्टीका उम्मेदवार अस्फुराले ४०.३ प्रतिशत मत प्राप्त गर्दै केन्द्र–दक्षिणपन्थी लिबरल पार्टीका साल्भादोर नास्रालालाई पराजित गरेका हुन् । नास्रालाले ३९.५ प्रतिशत मत प्राप्त गरेका थिए ।
सामाजिक सञ्जाल एक्समा प्रतिक्रिया जनाउँदै अस्फुराले भने, ‘होन्डुरस: म शासन गर्न तयार छु । म तपाईंहरूलाई निराश पार्ने छैन ।’
तर, नास्रालाले पत्रकार सम्मेलनमा नतिजा अस्वीकार गर्ने संकेत गर्दै भने, ‘छुट र बेवास्तामा आधारित नतिजा म स्वीकार गर्दिनँ ।’ यद्यपि उनले आफ्ना समर्थकलाई शान्त रहन आग्रह गरेका छन् ।
अमेरिकी विदेशमन्त्री मार्को रुबियोले सबै पक्षलाई नतिजाको सम्मान गर्न आग्रह गर्दै होन्डुरसमा शान्तिपूर्ण सत्ता हस्तान्तरण सुनिश्चित गर्नुपर्ने बताएका छन् । तर देशको संसद्का सभामुख लुइस रेडोन्डोले सामाजिक सञ्जालमा प्रतिक्रिया जनाउँदै नतिजा ‘पूर्ण रूपमा गैरकानूनी’ भएको दाबी गरेका छन् ।
गत ३० नोभेम्बरमा भएको निर्वाचनको मतगणना प्राविधिक अवरोधका कारण दुई पटक रोकिएको थियो । निर्वाचन अधिकारीहरूले ती अवरोधलाई अक्षम्य भनेका छन् । सीएनईकी अध्यक्ष आना पाओला हलले मतगणनाको जिम्मा पाएको निजी कम्पनीले सीएनईलाई जानकारी नदिई मर्मत कार्य गरेकाले ढिलाइ भएको बताएकी छन् ।
मत परिणाम निकै कडा रहेकाले र प्रणाली अव्यवस्थित बनेपछि करिब १५ प्रतिशत मतपत्र हातैले गन्नुपरेको थियो ।
ढिलाइका कारण होन्डुरसमा तनाव चर्किएको छ । गत साता देशभर प्रदर्शन भएका थिए । सत्तारूढ लिब्रे पार्टीका हजारौं समर्थकले राजधानी टेगुसिगाल्पामा प्रदर्शन गर्दै निर्वाचनमा धाँधली भएको आरोप लगाएका थिए ।
निर्वतमान राष्ट्रपति सिओमारा कास्त्रोले निर्वाचनमा ‘निर्वाचन कू’ भइरहेको आरोप लगाएकी थिइन् र यसमा ट्रम्पको ‘हस्तक्षेप’ रहेको दाबी गरेकी थिइन् ।
अस्फुरालाई समर्थन गर्दै ट्रम्पले यदि उनको सानो अग्रता उल्टाइए ठूलो परिणाम भोग्नुपर्ने चेतावनी दिएका थिए । उनले अस्फुरा नजिते अमेरिकाले आर्थिक सहयोग फिर्ता लिन सक्ने धम्कीसमेत दिएका थिए ।
त्यसैबीच, ट्रम्पले अस्फुराकै नेशनल पार्टीका सदस्य जुआन ओर्लान्डो हर्नान्देजलाई अप्रत्याशित रूपमा क्षमादान दिएका थिए । हर्नान्देज अमेरिकामा लागूऔषध र हतियारसम्बन्धी अभियोगमा ४५ वर्षको जेल सजाय भोगिरहेका थिए ।
संविधानका कारण राष्ट्रपति कास्त्रो दोस्रो कार्यकालका लागि उम्मेदवार बन्न पाएकी थिइनन् ।
निर्वाचन भएको नौ दिनपछि नास्रालाले भ्रष्ट व्यक्तिहरूले मतगणनामा चलखेल गरेको आरोप लगाएका थिए । उनले ट्रम्पका अभिव्यक्तिले आफ्नो जितको सम्भावना कमजोर बनेको पनि बताएका थिए ।
नतिजा सार्वजनिक भएपछि विदेशमन्त्री रुबियोले अमेरिकाले अस्फुराको आउने प्रशासनसँग द्विपक्षीय तथा क्षेत्रीय सुरक्षा सहकार्य मजबुत बनाउने, अवैध आप्रवासन रोक्ने र आर्थिक सम्बन्ध सुदृढ गर्ने बताएका छन् ।
