शेरबहादुर खड्का स्मृति प्रतिष्ठानको आयोजनामा नवौं शेरबहादुर खड्का स्मृति राष्ट्रिय महिला भलिबल प्रतियोगिता पुस २३ देखि २६ गतेसम्म सञ्चालन हुने भएको छ ।

प्रतियोगितामा तीन विभागीयसहित पाँच टोलीको सहभागिता रहने बिहीबार आयोजित पत्रकार सम्मेलनमा प्रतिष्ठानका अध्यक्ष रञ्जन खड्काले जानकारी दिए ।

प्रतियोगितामा नेपाल पुलिस क्लब, त्रिभुवन आर्मी क्लब, सशस्त्र प्रहरी बलको एपीएफ क्लब, न्यु डायमन्ड युथ स्पोर्ट्स क्लब र एभरेष्ट भलिबल क्लबको सहभागिता रहने छ ।

प्रतियोगिताका सहभागी टोलीलाई दुई समूहमा विभाजन गरी लिग कम नकआउट आधारमा खेल खेलाइने बताइएको छ ।

पेन्ट कम्पनी केएनपी नेरोलेकको मुख्य प्रायोजनमा हुने प्रतियोगिताको कुल पुरस्कार राशी १३ लाख रुपैयाँ रहेको छ । विजेताले पाँच लाख रुपैयाँ नगद पुरस्कार पाउने छ ।

यसैगरी, उपविजेता टोलीले दुई लाख ५० हजार र तेस्रो हुने टोलीले एक लाख २५ हजार रुपैयाँ पुरस्कार प्राप्त गर्नेछन् । विधागत उत्कृष्टलाई जनही २५ हजार रुपैयाँ पुरस्कार प्रदान गरिने छ ।

प्रत्येक खेलको ‘प्लेयर अफ द म्याच’ लाई १५ हजार रुपैयाँ पुरस्कार प्रदान गरिने छ । उद्‌घाटनका अवसरमा विगतमा झै एक राष्ट्रिय महिला खेलाडीलाई ५० हजार नगदसहित सम्मान गरिने छ ।

खेलहरू त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा खेलाइने छ । शुरूका ६ संस्करणको उपाधि एपीएफले जितेको थियो । सातौं संस्करणमा न्यु डायमन्ड च्याम्पियन बनेको थियो भने गत संस्करणमा पुलिस क्लब पहिलो भएको थियो ।

पत्रकार सम्मेलनमा नेरोलेकका कन्ट्री हेड मनोज मिश्र र प्रतिष्ठानकी संरक्षक गमली खड्काले मुख्य प्रायोजन सम्बन्धी सम्झौतापत्रमा पनि हस्ताक्षर गरेका थिए ।

प्रतियोगितालाई राखेप, बागमती प्रदेश खेलकुद विकास परिषद, विभिन्न कर्पोरेट हाउस र पालिकाहरुको सहयोग रहेको आयोजकले जनाएको छ ।

नेपाल भलिबल संघका अध्यक्ष जितेन्द्रबहादुर चन्दले प्रतियोगिताको सफलताका लागि शुभकामना दिए ।

प्रतिष्ठानका अध्यक्ष खड्काले हरेक खेलाडी र टेक्निकल टिमका सदस्यको पाँच लाख रुपैयाँ बराबरको बीमा गरिएको बताए ।

महिला खेलाडीको सशक्तीकरण र क्षमता अभिबृद्धि गर्ने उद्देश्यका साथ प्रतिष्ठानले २०७२ सालदेखि प्रतियोगिताको शुरूआत गरेको थियो ।