०४ साउन २०८३, सोमबार
नेपाल भलिबल संघ (एनभीए)द्वारा आयोजित नवौं एनभीए महिला तथा पुरुष भलिबल च्याम्पियनसिप–२०८२ मा महिलातर्फ न्यु डायमण्ड युथ स्पोर्ट्स क्लबले सुखद शुरूआत गरेको छ ।
प्रतियोगिताको दोस्रो दिन शनिबार त्रिपुरेश्वरस्थित राष्ट्रिय खेलकुद परिषद् (राखेप) को कभर्डहलमा खेलिएको खेलमा न्यु डायमण्डले चुली युवा क्लबलाई ३–० को सोझो सेटमा हराएको हो ।
पुल ‘ए’ अन्तर्गतको एकतर्फी खेलमा न्यु डायमण्डले पहिलो सेटको नतिजालाई २५–१० अंकले आफ्नो पक्षमा पारेको थियो ।
न्यु डायमण्डले दोस्रो सेटको नतिजालाई पनि सजिलै २५–५ अंकले आफ्नो पक्षमा पार्यो ।
तेस्रो सेटको भिडन्त भने प्रतिस्पर्धात्मक थियो । तर, तेस्रो सेटको खेलमा पनि न्यु डायमण्ड २५–१५ अंकले विजयी भयो ।
न्यु डायमण्डकी प्रभावशाली खेलाडी प्रतिभा माली पनि विदेशबाट फर्किएर छिट्टै टोलीमा सहभागी हुने बताइएको छ ।
