सुनसरीमा सशस्त्र प्रहरीले चलाएको गोली लागेर सर्वसाधारणको मृत्यु भएको घटनाको छानबिन गर्न सशस्त्र प्रहरी बल प्रधान कार्यालयले सशस्त्र प्रहरी वरिष्ठ उपरीक्षक (एसएसपी) को नेतृत्वमा छानबिन समिति गठन गरेको छ ।​

एसएसपी रविनराज कर्णजीतको संयोजकत्वमा तीन सदस्यीय समिति गठन भएको हो ।

समिति सदस्यमा कोशी प्रदेशको नम्बर १ बराह बाहिनी मुख्यालय पकलीका एसपी र सशस्त्रको कानून महाशाखाका एक डीएसपी रहनेछन् ।

यो समितिले घटनाबारे सत्य तथ्य छानबिन गरेर प्रतिवेदन पेस गरेपछि गल्ती देखिएमा विभागीय कारबाहीको प्रक्रिया अघि बढाइने सशस्त्र प्रहरी मुख्यालयले जनाएको छ ।

मुख्यालयका अनुसार घटना छानबिनका लागि अहिले बोर्डर आउट पोस्ट (बीओपी) कमान्डर, गुल्म कमान्ड र गण कमान्डरलाई बाहिनीमा झिकाइए सोधपुछ शुरू गरिएको छ ।

लौकही बीओपीका कमान्डर इन्स्पेक्टर मनीषकुमार कटुवाल, सीमा सुरक्षा गुल्म हरिपुरका कमान्डर डीएसपी गणेश दत्त पाण्डे र नम्बर ४ गण सुनसरीका कमान्डर एसपी निर्मलकुमार थापा छन् ।

उनीहरू तीनै जनालाई बाहिनी झिकाएर छानबिन अघि बढाइएको मुख्यालयले जनाएको छ ।

बुधबार मध्यराति सशस्त्र प्रहरीले चलाएको गोली लागेर सुनसरीको कोशी गाउँपालिका–१ का ४५ वर्षीय विजय साहको मृत्यु भएको थियो ।

चिनी तस्करी आरोपमा गोली चलाइएको सशस्त्रको दाबी छ ।