०५ साउन २०८३, मंगलबार
एनएसजेएफ पल्सर स्पोर्टस अवार्डको २२औँ संस्करण बुधबार आयोजना हुँदैछ । नेपाली खेलकुदकै यो प्रतिष्ठित अवार्ड नेपाल खेलकुद पत्रकार मञ्च (एनएसजेएफ)द्वारा प्रदान गरिँदै आएको छ । अवार्डको २२औँ संस्करण पोखरामा आयोजना हुनेछ ।
मञ्चले अवार्डको सम्पूर्ण तयारी पूरा भएको जनाएको छ । अवार्ड वितरण कार्यक्रम इतिहासमै पहिलो पटक काठमाडौँ बाहिर आयोजना हुन लागेको हो । अवार्डको पूर्वसन्ध्यामा मंगलबार स्पोर्टस समिटको पनि आयोजना गरिएको थियो ।
मञ्चअन्तर्गतको एनएसजेएफ एकेडेमीको आयोजनामा भएको उक्त समिटमा पोखरामा खेल पयर्टन र अर्थतन्त्रबारे छलफल भएको थियो । मञ्चका अध्यक्ष निरञ्जन अधिकारीले कार्यक्रमलाई लिएर आफू निकै उत्साही रहेको बताए ।
‘कार्यक्रमको सम्पूर्ण तयारी पूरा भइसकेको छ । अब हामी अवार्ड कार्यक्रम शुरू हुने क्षणको ब्यग्र प्रतीक्षामा छौं । शुरूमा मोफसलमा अवार्ड कार्यक्रमको आयोजना गर्दा धेरै चुनौती सामना गर्नुपर्ने लागेको थियो । तर, पोखरामा हामीले चुनौतीभन्दा पनि बढी अवसर देखेका छौं,’ उनले भने ।
मञ्चको पोखरा समन्वय शाखाका अध्यक्ष एमबी आस्था मगरले अवार्ड कार्यक्रमको आयोजनाले पोखरेली खेल इतिहासमा नयाँ अध्याय थपिएको बताए । ‘पोखरा सहर स्पोर्टस हबको रूपमा स्थापित हुँदै आएको छ । अब स्पोर्टस अवार्डको सफल आयोजनाले पोखराको खेल क्षेत्र अझ विस्तृत र फराकिलो भएको छ,’ उनी भन्छन् ।
अवार्ड कार्यक्रममा पोखरा महानगरपालिका प्रवर्द्धकको रूपमा रहेको छ । अवार्डको मुख्य प्रायोजकमा गोल्छा ग्रुपको निरन्तरता कायमै छ भने यस्तै पावर्ड बाईमा यती एयरलाइन्सको साथ थपिएको मञ्चाले जनाएको छ ।
यसपटक पनि १० विधामा अवार्ड प्रदान गरिने बताइएको छ । त्यसमा वर्ष खेलाडी पुरुष, वर्ष खेलाडी महिला, युवा वर्ष खेलाडी, वर्ष प्रशिक्षक, पिपल्स च्वाइस अवार्ड, पारा एथलिट सम्मान, स्पेसल अवार्ड, लाइफटाइम एचिभमेन्ट अवार्ड, टिम अफ द इयर र एसियन स्पोर्टस जर्नालिस्ट अवार्ड रहेका छन् ।
यी सबै विधाको विजेताको घोषणा अवार्ड कार्यक्रममै गरिने छ । वर्षको सर्वोत्कृष्ट पुरुष खेलाडीको मनोनयनमा क्रिकेटका दीपेन्द्रसिंह ऐरी, क्रिकेटकै कुशल भुर्तेल, उसुका विजयी सिन्जाली, टेबलटेनिसका स्यान्टु श्रेष्ठ र खो खोका जनक चन्द परेका छन् ।
यसैगरी, वर्षको सर्वोत्कृष्ट महिलातर्फको मनोनयनमा कराँतेकी एरिका गुरुङ, फुटबलकी रेखा पौडेल, कराँतेकी एलिसा रास्कोटी मगर, खो खोकी मानमति बिष्ट र भलिबलकी सलिना श्रेष्ठ परेका छन् ।
यसैगरी, वर्षको सर्वोत्कृष्ट युवा खेलाडीको मनोनयनमा एथलेटिक्सका अजय विक, कराँतेकी अञ्जली महर्जन, क्रिकेटकी पूजा महतो, बक्सिङकी स्वस्तिका तिरुवा र फुटबलका समीर तामाङ परेका छन् ।
वर्षको उत्कृष्ट प्रशिक्षकको मनोनयनमा पारा तेक्वान्दोका कविराज नेगी लामा, कराँतेका कुशल श्रेष्ठ, बक्सिङका दीपक महर्जन, क्रिकेटका महेश रिजाल र खो खोका लक्ष्मीनारायण वैद्य छन् ।
पिपल्स च्वाइस विधाको मनोनयनमा उसुका विजय सिन्जाली, क्रिकेटकी पूजा महतो, भलिबलका हिमाल सुनारी, फुटबलकी रेखा पौडेल र टेबलटेनिसकी इभाना थापा रहेका छन् ।
