०२ साउन २०८३, शनिबार
आईसीसी महिला टी–२० विश्वकपको विश्वस्तरीय छनोट प्रतियोगिताको अभ्यास खेलमा नेपाली टोलीले लगातार दोस्रो हार ब्यहोरेको छ ।
शुक्रबार काठमाडौंको मूलपानी क्रिकेट मैदानमा खेलिएको आफ्नो दोस्रो अभ्यास खेलमा नेपाली टोली स्कटल्यान्डसँग २७ रनले पराजित भएको हो । नेपाली टोली पहिलो अभ्यास खेलमा अमेरिकासँग आठ विकेटले पराजित भएको थियो ।
शुक्रबारको खेलमा टस जितेर पहिले ब्याटिङको निर्णय लिएको स्कटल्यान्डले निर्धारित २० ओभरमा ६ विकेट गुमाएर एक सय ८३ रन बनाएको थियो ।
जवाफी ब्याटिङमा ओर्लिएको नेपाली टोलीले भने निर्धारित ओभरमा ६ विकेट गुमाएर एक सय ५६ रनमात्र बनाउन सक्यो ।
विशाल लक्ष्य पछ्याएको नेपाली टोलीका लागि ओपनर सम्झना खड्काले अर्धशतकीय पाली खेलिन् । उनले अविजित ५२ रन बनाइन् । यसक्रममा उनले ४३ बलको सामना गरी सात चौका हिर्काइन् ।
इन्दु बर्मा २८ रन बनाउँदै आउट भइन् । उनले १९ बलमा दुई छक्का र दुई चौका प्रहार गरिन् । कविता जोशीले १२ बलमा एक छक्का र तीन चौकाको मद्दतले २२ रन बनाइन् ।
ओपनर बिन्दू रावल पाँच रन बनाउँदै पेभेलियन फर्किइन् । तेस्रो नम्बरमा क्रिज समाल्न आएकी काजोल श्रेष्ठ पनि पाँच रनभन्दा अगाडि बढ्न सकिनन् ।
पूजा महतो पनि दुई रनमै आउट भइन् । रुविना क्षेत्रीले खातासम्म खोल्न सकिनन् । कविता कुँवरले अविजित २९ रन बटुलिन् । उनले केवल १४ बलमा एक छक्का र चार चौका प्रहार गरिन् ।
स्कटल्यान्डकी बलर डार्सी कार्टरले तीन विकेट लिइन् । त्यसअघि, स्कटल्यान्डका लागि क्याथरिन ब्राइसले ६२ रन बनाएकी थिइन् । उनले केवल २८ बलमा एक छक्का र १२ चौका हिर्काएकी थिइन् ।
प्रियान्ज चटर्जीले पनि टोलीको खातामा ४० रन थपिन् । उनले केवल २५ बलमा एक छक्का र पाँच चौका प्रहार गरिन् । ओपनर डार्सी कार्टर र पिप्पा स्प्रोलले २१/२१ रन बनाए ।
नेपाली टोलीका बलर कविता कुँवर र रुविना क्षेत्रीले दुई/दुई विकेट लिए । रिया शर्मा र रचनाकुमारी चौधरीले पनि एक/एक विकेट हात पारे । नेपालले तेस्रो अभ्यास खेल आइतबार जिम्बाब्वेसँग खेल्नेछ ।
