२७ असार २०८३, शनिबार
निवर्तमान सभापति शेरबहादुर देउवा पक्षले पनि भाग खोजेपछि नेपाली कांग्रेसको टिकट वितरणमा ढिलाइ भएको छ । सभापति गगन थापालाई भेटेरै देउवा पक्षले भाग खोजेपछि टिकट वितरणमा ढिलाइ भएको कांग्रेसका एक पदाधिकारीले जानकारी दिए ।
उनका अनुसार कांग्रेसले हिजो (आइतबार) नै हिमाली र केही पहाडी जिल्लाको टिकट फाइनल गर्ने तयारी गरेको थियो । तर, देउवा पक्षले पनि भाग खोजेपछि त्यो हुन सकेन ।
स्रोतका अनुसार हिजै राति करिब २५ जिल्लाको टिकट टुंगो लगाएर सार्वजनिक गर्ने तयारी भएको थियो । तर, नाटकीय रूपमा देउवा समूहले टिकटमा सहभागिता खोजेपछि अन्तिममा रोकिएको हो । 'रमेश लेखक र डा. मिनेन्द्र रिजाल पठाएर उहाँहरूले आफ्नो हिस्सा खोज्नुभयो,' बैठकमा सहभागी एक पदाधिकारीले सोमबार बिहान लोकान्तरसँग भने ।
लेखक र रिजाल उम्मेदवारको लिस्ट नै बोकेर गएका थिए । तर, कांग्रेस नेताहरूले टिकट दिन तयार भए पनि अदालतमा दायर रिट फिर्ता लिनुपर्ने शर्त राखेका थिए । 'उहाँहरू लिस्ट नै बोकेर आउनुभयो र भाग माग्नुभयो,' ती पदाधिकारीले भने, 'हामी टिकट दिन तयार भयौं । तर, मुद्दा फिर्ता हुनुपर्छ भन्ने शर्त हामीले राखेका छौं । जवाफ आएको छैन ।'
त्यसपश्चात सभापति गगन थापा र उपसभापति विश्वप्रकाश शर्मासहित संसदीय बोर्ड सदस्यले असन्तुष्ट पक्षलाई पनि टिकट दिनुपर्छ भन्दै उम्मेदवारको सूची ननिकालेको ती पदाधिकारीले बताए । 'उहाँहरूले चाहेको मनोनयनको समय बढाउनु थियो । तर, समय बढेन । अब उहाँहरूलाई पनि भाग दिनैपर्छ,' अब के हुन्छ भन्ने प्रश्नमा अर्का पदाधिकारीले लोकान्तरसित भने ।
ती पदाधिकारीले आज बिहान ११ बजेबाट जिल्लागत टिकट फाइनल गर्दै अघि बढ्ने तयारी भएको बताए । 'हिजो फाइनल भएन । समय बढाउन नसकेर उहाँहरू भाग खोज्न आएपश्चात् अब सबै पक्षलाई मिलाएर निर्वाचन क्षेत्रगत टिकट फाइनल गर्दै अघि बढ्छौं,' उनले भने ।
सभापति थापाले पनि उम्मेदवार छान्ने काम अन्तिम चरणमा पुगेको जानकारी दिए । सोमबार बिहान सामाजिक सञ्जाल फेसबुकमा भिडियो सन्देश जारी गर्दै उनले सबैलाई मिलाएर लैजाने प्रयास भैरहेको बताएका हुन् ।
समयको चाप भए पनि नयाँ-पुराना सबैलाई मिलाएर लैजान संवाद गरिरहेको उनको भनाइ छ । 'उम्मेदवार छान्ने अन्तिम चरणमा छौं । सबैलाई समेटेर लैजाऔँ भन्ने हाम्रो प्रयास रहेको छ,' सन्देशमा उनले भनेका छन्, 'सकेसम्म नयाँ र पुरानो सन्तुलन र सबैलाई न्याय दिने हाम्रो प्रयास छ । समयको चाप पनि छ । एकता कायम गर्न संवाद गरिरहेका छौं । हामी आज सबै टुंग्याउँछौं ।'
जसले टिकट पाए पनि रुख चिन्हको आधिकारिकता लिएर आउनेलाई सघाउन उनले नेता कार्यकर्तालाई अपिल पनि गरेका छन् ।
काठमाडौंको भृकुटीमण्डपमा भएको विशेष महाधिवेशनबाट नयाँ नेतृत्व चुनिएपछि देउवा पक्ष असन्तुष्ट छ । निर्वाचन आयोगले समेत विशेष महाधिवेशनलाई आधिकारिता दिएपछि देउवा पक्ष अदालत पुगेको छ ।
आयोगको निर्णयविरुद्ध आइतबार दायर गरिएको रिटमा माघ ६ गतेका लागि तोकिएको प्रतिनिधिसभा निर्वाचनको उम्मेदवारी मनोनयन समेत रोक्न माग गरिएको छ ।
शेरबहादुर देउवा, पूर्णबहादुर खड्कालगायत निवेदक रहेको रिटमा माघ ६ गते हुने मनोनयन स्थगित गरी अर्को मिति तोक्नुपर्ने माग गरिएको छ । देउवा समूहले दायर गरेको रिट दर्ता भएको र मंगलबारका लागि पेसी तोकिएको छ ।
