गत भदौको जेनजी आन्दोलनपछि नेपाली राजनीतिमा वैकल्पिक शक्तिको नारा दिएर नयाँ दलहरू खुल्ने बहार आयो । आगामी चुनावअघि धेरै दल निर्वाचन आयोगमा दर्ता भए । यही भिडमा आएको थियो ‘राष्ट्रिय ऊर्जाशील पार्टी नेपाल’ पनि ।

तर, प्रतिनिधि सभा निर्वाचनमा भने पाटीले खासै ऊर्जा देखाउन सकेन । नाम ‘राष्ट्रिय’ राखिए पनि यो पार्टीले देशभरका १६५ निर्वाचन क्षेत्रमध्ये जम्मा ३ मा मात्र उम्मेदवार उठाएको छ । बाँकी १६२ क्षेत्रमा उम्मेदवार नै नपाएको ऊर्जाशीलकै नेताहरू बताउँछन् ।

यो पार्टीको मुख्य शक्ति र आधार क्षेत्र मोरङ हो । पार्टीका केन्द्रीय अध्यक्ष योगेन्द्र मण्डल आफैँ मैदानमा छन् ।  २०७९ सालको प्रतिनिधि सभा निर्वाचनमा मण्डलले मोरङ क्षेत्र नम्बर ५ बाट स्वतन्त्र उम्मेदवारका रूपमा सनसनीपूर्ण जीत निकालेका थिए । त्यतिबेला नेकपा एमाले र जसपाको गठबन्धनका कारण आफ्नो टिकट खोसिएपछि उनले ‘चापाकल’ चुनाव चिन्ह लिएर बागी उम्मेदवारी दिएका थिए ।

उनले २१ हजार ८२० मत ल्याएर तत्कालीन सत्ता र प्रतिपक्षी दुवै गठबन्धनका उम्मेदवारलाई स्तब्ध पारेका थिए । त्यतिबेला उनले माओवादीका शिवकुमार मण्डल र जसपाका राजकुमार यादवजस्ता हस्तीहरूलाई पराजित गरेका थिए ।

अहिले उनै मण्डलले आफ्नो स्वतन्त्र पहिचानलाई त्यागेर राष्ट्रिय ऊर्जाशील पार्टी गठन गरेका छन् र निर्वाचन आयोगबाट पुरानै चुनाव चिन्ह ‘चापाकल’ प्राप्त गरेका छन् ।

तर, आफ्नै नेतृत्वमा पार्टी बनाएर मैदानमा होमिँदा मण्डलले सोचेजस्तो साथ र समर्थन जुटाउन सकेको देखिँदैन । पार्टीले मोरङका तीन क्षेत्रबाहेक अन्यत्र कतै पनि उम्मेदवार खडा गर्न सकेन ।

मोरङ क्षेत्र नम्बर २ मा उम्मेदवार बनाइएका मनोजकुमार राजवंशी अध्यक्ष मण्डलकै कर्मचारी हुन् । उनी मण्डलद्वारा सञ्चालित जीवन विकास सामुदायिक अस्पतालमा मार्केटिङ विभागमा कार्यरत थिए । पार्टीमा बाहिरबाट कोही पनि सक्षम उम्मेदवार नआएपछि मण्डलले आफ्नै कर्मचारीलाई राजीनामा दिन लगाएर चुनावी मैदानमा उतारेको चर्चा मोरङको राजनीतिक वृत्तमा व्याप्त छ ।

पूर्वमाओवादी पृष्ठभूमिका राजवंशीलाई ‘डमी’ उम्मेदवारका रूपमा खडा गरिएको आरोप विपक्षीहरूले लगाउन थालेका छन् । त्यस्तै, मोरङ क्षेत्र नम्बर ३ बाट पार्टीले भुवनकुमार वाग्लेलाई उम्मेदवार बनाएको छ । वाग्ले पनि पूर्वमाओवादी कार्यकर्ता हुन् ।  ऊर्जाशील पार्टीमा नयाँ र ऊर्जावान् युवाहरूभन्दा पनि अध्यक्ष मण्डलको व्यक्तिगत प्रभावमा रहेका व्यक्तिहरू र अन्य दलका असन्तुष्ट पुराना अनुहारहरूको मात्रै बाहुल्यता देखिएको छ ।

देशभरि आफ्नो सङ्गठन विस्तार गर्ने दाबी गरेको पार्टीले आफ्नै जिल्लाका ६ वटा क्षेत्रमध्ये पनि जम्मा ३ वटामा मात्रै उम्मेदवारी दिएको छ ।

अध्यक्ष मण्डलको भने आफ्नै तर्क छ । उनी पार्टी गठन भएको छोटो समय भएकाले सबैतिर उम्मेदवारी दिन नसकिएको दाबी गर्छन् । उनी भन्छन्, ‘हामीले पार्टी दर्ता गरेर काम शुरू गरेको जम्मा दुई–अढाइ महिना मात्र भएको छ । यति छोटो अवधिमा देशभरका सबै क्षेत्रमा योग्य उम्मेदवार छनोट गर्न र सङ्गठन निर्माण गर्न सम्भव भएन । त्यसैले हामीले योपटक हाम्रो पकड बलियो भएका क्षेत्रमा मात्रै केन्द्रित हुने निर्णय गरेका हौँ ।’

मण्डल जीवन विकास लघुवित्तका सञ्चालकसमेत हुन् ।  जीवन विकास लघुवित्तका सञ्जाल मोरङमा निकै बलियो छ । उनले यही व्यावसायिक सञ्जाललाई राजनीतिक शक्तिमा बदल्ने प्रयास गरिरहेका छन् ।

मोरङ ५ मा यसपटक १ लाख १० हजार १७७ मतदाता रहेका छन । अघिल्लोपटक स्वतन्त्र उठ्दा मण्डललाई गठबन्धनप्रति असन्तुष्ट रहेका एमाले र अन्य दलका कार्यकर्ताको ठूलो साथ मिलेको थियो । तर, यसपटक परिस्थिति फेरिएको छ । अहिले उनी आफ्नै पार्टीको चिन्ह लिएर मैदानमा छन् र सबै दलहरूले पनि आ–आफ्ना उम्मेदवार उठाएका छन्  ।