१२ साउन २०८३, मंगलबार
नेपालमा पहिलो पटक चेसको पजल सोल्भिङ प्रतियोगिता आयोजना हुने भएको छ । प्रतियोगिता आइतबार हुनेछ ।
हिमालयन चेस एकेडेमीले वर्ल्ड फेडेरेसन फर चेस कम्पोजिसन (डब्लूएफसीसी) सँगको सहकार्यमा प्रतियोगिता आयोजना गर्न लागेको हो ।
एकेडेमीका अनुसार इन्टरनेशनल सोल्भिङ कन्टेस्ट–२०२६ को एउटा प्रतियोगिताको रूपमा नेपालमा पहिलो पटक पजल सोल्भिङ कन्टेस्ट आयोजना गर्न लागिएको हो । इन्टरनेशनल सोल्भिङ कन्टेस्ट (आईएससी) सन् २००५ मा शुरू भएको थियो ।
गत वर्ष भएको २१औं संस्करणमा २८ देशका ४६ शहरमा सात सय ४५ जनाले प्रतिस्पर्धा गरेका थिए ।
२२औं संस्करणमा नौ सयभन्दा बढी खेलाडीले सहभागिता जनाउने अनुमान गरिएको छ । यसपटक २७ देशका ६५ शहरमा एकसाथ जनवरी २५ तारिखमा कार्यक्रम आयोजना गरिँदैछ ।
पजल सोल्भिङ कन्टेस्ट हिमालयन चेस एकेडेमीको थापाथलीस्थित चेस हलमा सञ्चालन हुनेछ ।
प्रतियोगितामा उत्कृष्ट नतिजा ल्याउने खेलाडीले जर्मनीमा सन् २०२६ को अगस्ट ८ देखि १५ तारिखसम्म सञ्चालन हुने ४९औं वर्ल्ड चेस सोल्भिङ च्याम्पियनसिपमा भाग लिन पाउने छन् ।
एकेडेमीका अनुसार डब्लूएफसीसीको रेटेड इभेन्टको रूपमा आयोजना हुने सोल्भिङ कन्टेस्टमा अनुभवी खेलाडीले क्याटगोरी–१, कम अनुभवीले क्याटगोरी–२ र १३ वर्षमुनिका खेलाडीले जुनियरको क्याटगोरी–३ मा प्रतिस्पर्धा गर्नेछन् ।
क्याटगोरी १ र २ का पजल सोल्भरले डब्लूएफसीसीको रेटिङ पाउनेछन् । कन्टेस्टमा करिब ३० जना सहभागी हुने अनुमान गरिएको एकेडेमीले जनाएको छ ।
