२८ असार २०८३, आइतबार
पोखरामा जारी एनसेल टाइगर कप महिला तथा पुरुष भलिबल प्रतियोगिताको शनिबार सम्पन्न पुरुषतर्फको खेलमा गण्डकी प्रदेश भलिबल संघ विजयी भएको छ ।
पोखरा रंगशालाको भलिबल कोर्टमा खेलिएको उक्त खेलमा गण्डकी प्रदेश भलिबल संघले माल्दिभ्सलाई ३–० को सोझो सेटमा हराएको हो ।
खेलको प्रारम्भदेखि नै गण्डकी प्रदेश भलिबल संघले प्रतिद्वन्द्वीलाई दबाबमा राखेको थियो । गण्डकी प्रदेश भलिबल संघले पहिलो सेटको नतिजालाई २५–१३ अंकले आफ्नो पक्षमा पार्यो ।
गण्डकीले दोस्रो सेटको नतिजालाई पनि २५–१४ अंकले आफ्नो पक्षमा पार्यो । तेस्रो सेटमा पनि गण्डकी प्रदेशको टोली २५–२१ अंकले विजयी भयो ।
पुरुषतर्फ खेलिएको यो तेस्रो खेल हो । यसअघि, प्रतियोगिताको पहिलो दिन खेलिएको पुरुषतर्फको खेलमा सशस्त्र प्रहरी बलको एपीएफ क्लबले गण्डकी प्रदेशलाई ३–१ सेटले हराएको थियो ।
सोही दिन खेलिएको पुरुषतर्फको अर्को खेलमा विभागी टोली त्रिभुवन आर्मी क्लबले माल्दिभ्सलाई ३–० सेटले पराजित गरेको थियो ।
प्रतियोगिताको छैटौं संस्करणमा महिलातर्फ पाँच र पुरुषतर्फ ६ टोली सहभागी छन् । महिलातर्फ न्यु डायमण्ड, आर्मी, नेपाल पुलिस क्लब, एपीएफ क्लब र थाइल्याण्ड क्विन्स सहभागी छन् ।
पुरुषतर्फ नेपाल पुलिस क्लब, त्रिभुवन आर्मी क्लब, एपीएफ क्लब, गण्डकी प्रदेश भलिबल संघ, पर्वत जिल्ला भलिबल संघ र माल्दिभ्सको टोली सहभागी छन् ।
