०६ साउन २०८३, बुधबार
टिप टप न्यू डायमण्ड युथ स्पोर्टस क्लबले पोखरामा जारी छैटौं टाइगर कप भलिबल च्याम्पियनसिपको महिलातर्फको उपाधि चुमेको छ ।
न्यू डायमन्डले शुक्रबार पोखरा रंगशालाको भलिबल कोर्टमा खेलिएको फाइनल खेलमा बलियो प्रतिद्वन्द्वी नेपाल पुलिस क्लबलाई ३–० को सोझो सेटमा हराउँदै उपाधि कुम्ल्याएको हो ।
खेलको प्रारम्भदेखि नै न्यू डायमन्डले विभागीय टोली पुलिस क्लबलाई दबाबमा राखेको थियो । न्यू डायमन्डले पहिलो सेटको नतिजालाई २५–११ अंकले आफ्नो पक्षमा पार्यो ।
दोस्रो सेटको खेल निकै प्रतिस्पर्धात्मक बनेको थियो । तर, दोस्रो सेटमा पनि न्यू डायमन्ड २५–२२ अंकले अगाडि रह्यो ।
यसैगरी, तेस्रो सेटको नतिजालाई पनि २५–१६ अंकले आफ्नो पक्षमा पार्दै न्यू डायमन्डले उपाधि कुम्ल्यायो । न्यू डायमन्डले केही समयको अन्तरमा तेस्रोपटक पुलिसलाई हराउँदै उपाधि चुमेको हो ।
केही समयअघि काठमाडौँमा सम्पन्न एनभीए च्याम्पियनसिपको फाइनलमा पुलिस क्लबलाई नै हराउँदै न्यू डायमन्डले उपाधि उचालेको थियो ।
त्यसपछि, काठमाडौँमै आयोजित केएनपी राष्ट्रिय महिला भलिबल प्रतियोगिताको फाइनलमा पनि पुलिस क्लबलाई नै जिल्याउँदै न्यू डायमन्डले उपाधि चुमेको थियो ।
