रूसले युक्रेनको ऊर्जा क्षेत्रमा लक्षित गर्दै व्यापक आक्रमण गरेपछि देशभर विद्युत् आपूर्ति प्रभावित भएको छ । युक्रेनका राष्ट्रपति भोलोदिमिर जेलेन्स्कीका अनुसार १ हजार १०० भन्दा बढी अपार्टमेन्टमा हालसम्म पनि बिजुली आपूर्ति ठप्प छ ।

राजधानी कीएभमा विद्युत् सेवा पुनःस्थापना गर्न २०० भन्दा बढी मर्मत टोलीहरू निरन्तर रूपमा खटिएका छन् । हालै रूसले फेरि आक्रमणको तीव्रता बढाएको जेलेन्स्कीले बताएका छन् ।

यसअघि एक सातासम्म आक्रमणमा केही विराम देखिएको थियो । उक्त अवधिमा अमेरिकाका राष्ट्रपति डोनाल्ड ट्रम्पले युक्रेनमा कडा जाडो परिरहेका बेला रुसी राष्ट्रपति भ्लादिमिर पुटिनलाई आक्रमण नबढाउन आग्रह गरेका थिए ।

यसैबीच शान्ति योजनाका विवरणहरूबारे छलफल गर्न अमेरिका, युक्रेन र रूसका अधिकारीहरू पुनः अबु धाबीमा बैठकमा जुटिरहेका छन् ।