भारत सरकारले आफ्नो सैन्य क्षमतामा व्यापक वृद्धि गर्ने उद्देश्यले ११४ वटा नयाँ राफाल लडाकु विमान खरिद गर्ने निर्णय गरेको छ। रक्षामन्त्री राजनाथ सिंहको अध्यक्षतामा बिहीबार बसेको रक्षा अधिग्रहण परिषद् (डीएसी) को बैठकले रक्षा बलका लागि आवश्यक क्षमता विस्तार गर्न ३.६० लाख करोड भारतीय रुपैयाँ बराबरको 'एक्सेप्टेन्स अफ नेसेसिटी' (एओएन) लाई स्वीकृति दिएको हो।
रक्षा मन्त्रालयले सामाजिक सञ्जालमार्फत दिएको जानकारी अनुसार, यो निर्णयको मुख्य लक्ष्य वायु प्रभुत्व (एयर डमिनेन्स), 'डीप स्ट्राइक' क्षमता र निरन्तर निगरानी प्रणाली (आईएसआर) लाई थप मजबुत बनाउनु हो। स्वीकृत बजेट अन्तर्गत वायुसेनाका लागि राफाल लडाकु विमानका साथै कम्ब्याट मिसाइल र एएस-एचएपीएस जस्ता आधुनिक सैन्य उपकरणहरू खरिद गरिनेछ। यस योजनाको अर्को महत्त्वपूर्ण पक्ष भनेको यीमध्ये अधिकांश सैन्य सामग्रीहरूको निर्माण भारतमै गरिनेछ, जसले स्वदेशी उत्पादनलाई प्रोत्साहन दिनेछ।

समाचार एजेन्सी पीटीआईका अनुसार, ११४ वटा राफाल जेट खरिद गर्ने यो प्रस्ताव लामो समयदेखि प्रक्रियामा रहेको थियो। करिब १३ वर्षअघि यस्तै प्रकारको खरिद सम्झौताको प्रक्रिया अघि बढे पनि विभिन्न कारणले त्यो सफल हुन सकेको थिएन। बिहीबारको निर्णयले उक्त लामो पर्खाइलाई अन्त्य गर्दै भारतीय वायुसेनाको आधुनिकीकरणमा नयाँ आयाम थपेको छ।

यो बजेट विनियोजनबाट वायुसेना मात्र नभई भारतीय थल सेना र जल सेनाले पनि आफ्नो सैन्य शक्ति र पूर्वाधार सुदृढ गर्ने अवसर पाउनेछन्। यसैगरी, भारतीय तटरक्षक बल (कोस्ट गार्ड) लाई पनि समुद्री क्षेत्रमा निगरानी र सुरक्षा व्यवस्था कडा बनाउन थप स्रोतसाधन उपलब्ध गराइने मन्त्रालयले जनाएको छ। राफाल विमानको यो थप खरिदले दक्षिण एसियाली क्षेत्रमा भारतको सामरिक शक्तिलाई अझ प्रभावकारी बनाउने रक्षा विश्लेषकहरूको बुझाइ छ।