ज्यान मार्ने उद्योग कसुरमा जेल चलान भएका राजीव गुरुङ उर्फ दीपक मनाङे सजाय पूरा गरेर बुधबार जेलमुक्त भएका छन् ।

पाँच वर्ष कैद सजाय तोकिएका उनले विभिन्न चरणमा कैद भुक्तान गर्दै आएका थिए । पछिल्लो पटक उनी डिल्लीबजार कारागारमा विगत १४ महिनादेखि कैद भुक्तान गरिरहेका थिए ।

२०६१ वैशाख ३१ मा काठमाडौंको महाराजगञ्जस्थित चुफाङ रेस्टुरेन्टमा चक्रे मिलनको समूह र मनाङे समूहबीच ‘ग्याङ फाइट’ भएको थियो । दुवै पक्ष खुँडा र धारिलो हतियारसहित थिए । मनाङेले धारिलो हतियार प्रहार गरी चक्रे मिलनको बायाँ हात छिनाइदिए ।

लगत्तै चक्रे मिलनको हात त्रिवि शिक्षण अस्पताल महाराजगञ्जमा लगेर जोडियो ।

सोही घटनापछि चक्रेकी श्रीमतीले प्रहरीमा ज्यान मार्ने उद्योगमा मनाङेसहित पाँच जनाविरुद्ध किटानी जाहेरी दिएकी थिइन् ।

प्रहरीको अनुसन्धानपछि काठमाडौं जिल्ला अदालतमा ज्यान मार्ने उद्योगमा मुद्दा दायर भयो । जिल्ला अदालतको आदेश अनुसार २०६२ वैशाख १३ मा उनी पुर्पक्षका लागि डिल्लीबजार कारागार चलान भएका थिए ।

पछि अदालतले दुई वर्ष मात्रै कैद सुनायो । जिल्लाको फैसला चित्त नबुझेपछि सरकारले उच्च अदालतमा पुनरावेदन दियो ।

उच्चले पाँच वर्षको कैद सुनाएको थियो । तर, त्यो बीचमा मनाङे मनाङबाट प्रदेशसभामा निर्वाचित समेत भएका थिए ।

उनी प्रदेशसभा सदस्यमा निर्वाचित बनेपछि सर्वोच्चले २०८१ कात्तिक २० गते उच्च अदालतको फैसला सदर गरेको थियो । त्यसपछि उनी कारागार चलान भएका थिए ।