२८ जेठ २०८३, बिहीबार
सन् २०१२–१३ सिजनपछि उपाधि जित्न नसकेको म्यानचेस्टर युनाइटेड इङ्लिस प्रिमियर लिगको आफ्नो पछिल्लो खेलमा बर्नमाउथसँग २–२ गोलको बराबरीमा रोकिएको छ ।
म्यानचेस्टर युनाइटेडले खेलका क्रममा दुईपटक अग्रता लिएर पनि त्यसलाई जोगाउन सकेन । पहिलो हाफ गोलरहित बराबरीमा सकिएको उक्त खेलमा म्यान युनाइटेडले ६१औँ मिनेटमा अग्रता लियो ।
म्यान युनाइटेडका ब्रुनो फर्नान्डेसले पहिलो गोल गरे । उनले पेनाल्टी प्रहारको अवसरलाई सदूपयोग गर्दै गोल गरेका हुन् ।
तर, म्यान युनाइटेडको त्यो अग्रता लामो समय टिक्न सकेन । खेलको ६७औँ मिनेटमा बर्नमाउथका रायन क्रिस्टीले जवाफी गोल फर्काए ।
यसैगरी, ७१औँ मिनेटमा म्यान युनाइटेडले फेरि अग्रता लियो । बर्नमाउथका जेम्स हिलबाट आत्मघाति गोल भएपछि म्यान युनाइटेड २–१ ले अगाडि बढेको थियो ।
तर, म्यान युनाइटेडको त्यो अग्रता पनि लामो समय टिक्न सकेन । खेलको ८१औँ मिनेटमा बर्नमाउथका जुनियर क्रुपीले पेनाल्टीमार्फत जवाफी गोल गरे ।
अनुभवी खेलाडी ह्यारी माग्वायरको गल्तिका कारण बर्नमाउथले पेनाल्टी प्रहारको अवसर पाएको थियो । दुई वर्षपछि इङ्ल्यान्डको राष्ट्रिय टोलीमा फर्किएका ह्यारीका लागि प्रिमियर लिगको यो खेल भने सुखद रहेन । उनी निर्धारित समयको ७८औँ मिनेटमा सिधै रातो कार्ड पाउँदै मैदानबाट बाहिरिएका थिए ।
म्यान युनाइटेड ३१ खेलबाट ५५ अंक बटुल्दै तालिकाको तेस्रो स्थानमा आसिन छ । समान खेलबाट ७० अंक जोडेको आर्सनल पहिलो र ३० खेलबाट ६१ अंक बटुलेको म्यानचेस्टर सिटी दोस्रो स्थानमा छन् । बर्नमाउथ भने ३१ खेलबाट ४२ अंक जोड्दै तालिकाको १०औँ स्थानमा छ ।
